Depýtat Artsport jobasy aıasyndaǵy kemshilikterdi aıtty

ASTANA. QazAqparat - «Artsport» jobasyn jurtshylyq jyly qabyldaǵan bolatyn jáne tegin úıirmeler men sektsııalarǵa barý arqyly balalardyń damýyna yqpal etti. Alaıda, keıinnen sybaılas jemqorlyq qaýpi tónetin kóptegen faktor anyqtalyp otyr. Senator Rýslan Rústemov elimiz Premer-Mınıstriniń atyna joldaǵan depýtattyq saýalynda osy problemalardy shuǵyl sheshýdiń mańyzdylyǵy týraly aıtty, dep habarlaıdy QazAqparat tilshisi.

Senatordyń aıtýynsha, baǵdarlamany engizý oblystyq mádenıet jáne sport basqarmalaryna qosymsha aýqymdy júkteme túsirdi. Basqarma tarapynan qadaǵalaý, tekserý jáne aqy tóleý jónindegi jumystardyń kólemin eskere otyryp, qarjynyń nysanaly jumsalýynda kemshilikterge jol berý qaýpi joǵary bolyp otyr.

«Aýdandar men oblystyq mańyzy bar qalalarǵa bólinetin qarajatty ár aýmaqtaǵy balalardyń sanyna qaraı proportsıonaldy eseptep, baǵdarlamany júrgizý jáne qarjylandyrý fýnktsııasyn aýdandyq, qalalyq bıýdjetterge berý kezek kúttirmeıtin másele», - dedi Rýslan Rústemov.

Senator «Artsport» baǵdarlamasy boıynsha memlekettik satyp alýdy júzege asyrý úshin biryńǵaı aqparattyq júıeniń joqtyǵyna da nazar aýdardy.

Depýtattyń sózine qaraǵanda, óńirlerdiń túrli aqparattyq júıege kóshýi kásipkerlerge tólem jasaýdy keshiktiredi jáne qarjyny maqsatty jumsaý kezinde táýekelder bolady.

«Baǵdarlamany tıimdi iske asyrý úshin biryńǵaı aqparattyq júıeni aıqyndaý, jalpy respýblıkalyq jelini qalyptastyrý úshin salalyq normatıvtik quqyqtyq aktilerge mańyz berýdi Mádenıet jáne sport mınıstrligine tapsyrýdy suraımyz», - dedi senator.