Depýtat alıment mólsherin aıqyndaý tetigin qaıta qaraýdy usyndy

<p>ASTANA. KAZINFORM &ndash; Balalardyń ómirine tıisti jaǵdaı jasaý úshin alıment árdaıym jete bermeıdi. Senator Janna Asanova osyndaı tólemderdi esepteý tártibin qaıta qaraýdy usyndy. Sondyqtan ol óziniń depýtattyq saýalynda osy saladaǵy problemany kóterdi.</p>

Depýtattyń aıtýynsha, «Neke (erli-zaıyptylyq) jáne otbasy týraly» kodekste alıment bir balaǵa ata-ana tabysynyń tórtten birin quraıtyny kórsetilgen. Alıment tóleıtin ata-ana kóbinese is júzinde eń tómengi jalaqyny 85 myń teńge etip kórsetip, kirisin tómendetip júredi. Nátıjesinde bir balaǵa alıment nebári 22 myń teńgeni quraıdy.

«Bizdiń elimizdegi árbir bala tek tamaq pen kıim ǵana emes, sonymen qatar bilim alýǵa, medıtsınalyq qyzmet pen basqa da áleýmettik ıgilikterge qol jetkizýdi qamtıtyn laıyqty ómir súrý deńgeıine quqyly. Alıment mólsherin anyqtaýdyń qoldanystaǵy tártibi eskirdi jáne balanyń jas ereksheligi de eskerilmeıdi. Bul balalardyń tolyqqandy damýyna qajet resýrsqa qol jetkize almaýyna ákeledi. Qazirgi kezde elimizdiń zańnamasynda alımenttiń eń tómengi mólsheri týraly túsinik joq, óıtkeni olar alıment tóleýshiniń kiris mólsherine qaramastan úlestik qatynasta esepteledi. Munyń bári óndirip alynatyn alıment mólsherin azaıtý maqsatynda tóleýshige óziniń naqty tabysyn jasyrýyna alyp keledi», - dedi Janna Asanova Úkimet basshysynyń orynbasary Tamara Dúısenovanyń atyna joldaǵan saýalynda.

Sonymen qatar depýtat sot arqyly alıment mólsherin ózgertý nemese olardy belgilengen mólsherde belgileý múmkindigine qaramastan, boryshkerdiń naqty kirisin eńbek qatynastarynyń ereksheligine baılanysty dáleldeý qıyn ekenin atap ótti.

«Otbasylyq jaǵdaı men balalar sany jáne olardyń naqty suranysyn eskere otyryp, alımenttiń neǵurlym ádil mólsherin belgileý úshin neke-otbasy zańnamasynyń erejelerin qaıta qaraý múmkindigin qarastyrýdy suraımyn. Jasyna jáne áleýmettik faktorlarǵa baılanysty balalarǵa negizgi qajet zattar men suranysyna taldaý jasaý kerek. Alımentti tómendetýdiń aldyn alý úshin jumys berýshiler men ózin ózi jumyspen qamtyǵandardyń kiristerdi jasyrýyn anyqtaý tetigin ázirleý kerek», - dedi Janna Asanova.

Aıta keteıik, Tarazda 4 mln teńgeden astam alıment tólemegen adam anyqtalyp, sotqa deıingi tergeý bastaldy. 

Astanada alıment bereshegi bar 150 boryshkerge qumar oıyn oınaýǵa tyıym salyndy.