Depozıtterdiń jalpy kólemi eń joǵary kórsetkishke jetti – Ulttyq bank

NUR-SULTAN. QazAqparat – Teńgedegi depozıtter kólemin ulǵaıtyp, salymdarda dollar úlesi azaıdy. Bul týraly QR Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Ulttyq bank qabyldaǵan sharalarǵa toqtalsaq, teńgedegi depozıtter kólemin ulǵaıtyp, salymdardyń dollarlanýyn tómendetip, ulttyq valıýtadaǵy aktıvterdi qorǵaýǵa múmkindik berdi. Maýsym aıynan bastap teńgedegi depozıtterdiń ósýi baıqalyp otyr. Depozıtterdiń jalpy kólemi eń joǵary kórsetkishke, ıaǵnı 28,1 trln teńgege jetti», - dedi Ǵ. Pirmatov elordada ótken baspasóz máslıhatynda.

Onyń aıtýynsha, depozıtterdiń dollarlanýy osy jylǵy aqpandaǵy eń joǵary deńgeı 38,4 paıyzdan shildeniń sońyndaǵy 35,4 paıyzǵa deıin tómendedi. Al iri salymdardy qospaǵanda, halyqtyń depozıtteriniń dollarlanýy rekordtyq tómen belgige deıin 15%-ǵa jetti.

«Qabyldanǵan sharalar aıasynda nesıe bólý qarqyny jalǵasty. Osy jylǵy shildede ekonomıkaǵa nesıeler jyldyq mánde halyq pen bızneske teńgemen nesıe bólý esebinen 20,4 trln teńgege deıin 27,1 paıyzǵa, osy jyldyń basynan bastap 10,1 paıyzǵa ósti. Ulttyq bank tamyzda ekonomıkaǵa nesıe bólý boıynsha keńeıtilgen statıstıkany jarııalaı bastady. Basqa qarjy uıymdaryn esepke alǵanda, ekonomıkaǵa nesıe baǵyttaýdyń jalpy somasy 24,2 trln teńge qurdy», - dedi UB basshysy.

Budan buryn habarlanǵandaı, Ulttyq bank bazalyq stavkany 14,5% deńgeıinde saqtap qalady.