Depozıtke qarjyny qandaı valıýtada salǵan tıimdi

ALMATY. QazAqparat - Almatyda ótken baspasóz máslıhaty barysynda Qazaqstan depozıtterdi kepildendirý qorynyń dollardaǵy depozıtterdiń stavkasyn 1 %-ǵa azaıtý týraly sheshimine qatysty túsinikteme berdi, dep habarlaıdy QazAqparat tilshisi.

2017 jyly paıyz kórsetkishi eki ret tústi.

Shildede 1,5% bolsa, 1 jeltoqsannan - 1%-ke tústi.

«Bankterge dollar passıvterin salatyn jer joq. Qazir bankter tek teńgemen nesıe berip jatyr. Dollarmen qarjylandyrylatyn korporatıvti klıentterdiń sany az. Dollar passıvterin Ulttyq bankke saqtap jatyrmyz. Bul onsha tıimdi emes», - dedi «Halyk bank» basqarma tóraıymy Úmit Shaıahmetova.

Salymshylar mundaı sheshimge qatysty narazylyǵyn bildirip jatyr.

«Jylyna 1%, bul óte az. Bul eldegi aqsha saıasatyn dollarsyzdandyrýǵa baǵyttalǵan jumys. Klıentter úshin tyǵyryqtan shyǵatyn birneshe jol bar: paılyq úlestik qorlar, qundy qaǵazdar», - dedi Qazkom basqarma tóraǵasy Ýlf Vokýrka.

Qarjygerlerdiń aıtýynsha, qarjyny teńgede saqtaǵan salymshylar birshama utady.

«0% bolsa da bankte saqtaǵan qaýipsiz. Depozıtke dollar salýshylar sany azaıyp keledi. Sonda da bankterge tepe-teńdikti saqtaý kerek. Salymshylarǵa bankte aqsha saqtaý tıimsiz bolǵan kezde olar shetelge ınvestıtsııa quıa bastaıdy. Biraq mundaı múmkindik bárinde bola bermeıdi. Ortasha segmenttegi salymshylarǵa teńgeniń 12% syıaqysyna kóshken tıimdi. Dollar depozıtterine qatysty vıp bankıngti, paılyq úlestik qorlarmen jumysty damytyp jatyrmyz. Dollar aktıvterin qundy qaǵazǵa salý múmkindigi de arta tústi. Suranys bar»,- dedi «Halyk bank» basqarma tóraıymy Úmit Shaıahmetova.

Aıta ketý kerek, Qazaqstan depozıtterdi kepildendirý qorynyń dırektorlar keńesi 2017 jyldyń 1 jeltoqsanynan bastap dollar valıýtasynda aqsha saqtaıtyn jeke tulǵalarǵa - paıyzdyq mólsherlemeni jylyna 1%, teńgemen aqsha saqtaıtyn salymshylarǵa 14% retinde bekitti.