Depozıtinde 1 mln teńgeden astam aqshasy barlardyń 94 paıyzy ótemaqyǵa ótinish berdi

ASTANA. QazAqparat - 20 qańtardaǵy jaǵdaı boıynsha bankter teńgelik salym boıynsha ótemaqy tóleýge 304,4 mlrd teńgege ótinish qabyldady. Bul - memleket tarapynan tólenýge jatatyn ótemaqynyń áleýetti somasynyń 92,3 paıyzy, dep habarlaıdy QazAqparat Qazaqstannyń depozıtterge kepildik berý qoryna silteme jasap.

Úkimettiń 2022 jylǵy 30 jeltoqsandaǵy qaýlysyna sáıkes, ótemaqy tóleýge ótinish berý merzimi uzartyldy.

Endi salymshylar bankke sońǵy kúnin qosa alǵanda 2023 jyldyń 10 aqpanyna deıin júgine alady.

QDKBQ 5 mıllıonnan astam depozıtor salymdary ótemaqy tólenýge jatatynyn atap ótti.

Statıstıka boıynsha depozıtinde 1 mln teńgeden astam aqshasy bar azamattardyń 94% ótemaqy alýǵa ótinish bergen.

«Qarjy mınıstrligi men Ulttyq bank ázirlegen baǵdarlamanyń qaǵıdalaryna sáıkes keletin barlyq depozıtterge, olardaǵy aqsha qaldyǵynyń mólsherine qaramastan, syılyqaqy esepteletinin eske salǵymyz keledi. Bankterge baryp, ótemaqy alýǵa kelisimin áli rastamaǵan depozıtorlar sońǵy kúnin qosa alǵanda 2023 jyldyń 10 aqpanyna deıin kelisimin rastaı alady. Ótinishti bankterdiń bólimshelerinde nemese mobıldi qosymsha arqyly onlaın túrinde berýge bolady. Bankter ótemaqyny 2023 jyldyń 23 aqpanynan keıin tóleı bastaıdy. 10%-dyq ótemaqy eseptelýi múmkin maksımaldy soma bir bankte 20 mln teńgeni quraıdy», - dedi QDKBQ tóraǵasynyń orynbasary Almas Qudaıbergenov.

QDKBQ esterińizge salady, ótemaqy alýdyń basty sharty – salym sońǵy kúnin qosa alǵanda 2023 jyldyń 23 aqpanyna deıin saqtalýy tıis.

Ótemaqy depozıtte jyl barysynda saqtalǵan eń az somaǵa esepteledi.

Salymshylar tólem rásimi boıynsha qosymsha aqparatty salym ornalasqan bankterden bile alady nemese saýaldaryn [e-mail] poshtasyna, @kdif_ask Telegram-chatyna joldaýlaryna bolady nemese 1460 tegin nómiri arqyly QDKBQ-nyń baılanys ortalyǵyna habarlasa alady.