Densaýlyq vıtse-mınıstri qazaqstandyqtarǵa úndeý jasady
14:45, 06 Qańtar 2022
NUR-SULTAN. QazAqparat – Qazaqstan aýrýhanalary kúsheıtilgen rejımde jumys istep tur. Bul týraly QR Densaýlyq saqtaý vıtse-mınıstri Ajar Ǵınııat málim etti, dep habarlaıdy QazAqparat tilshisi.
«Habar 24» telearnasyna suhbat bergen vıtse-mınıstrdiń atap ótýinshe, respýblıka aýrýhanalary kúsheıtilgen rejımde jumys istep tur. Zardap shekkenderge medıtsınalyq kómek tolyq kólemde kórsetilip jatyr. Bul rette negizgi júkteme hırýrgııalyq blok pen jansaqtaý bólimine túsip otyr.
«Medıtsına qyzmetkerleriniń jumysyna jáne olardyń kásibı mindetterin oryndaýyna kedergi keltirmeýdi ótinemiz. Sonymen qatar ólim-jitimniń jáne adamdardyń densaýlyǵyna aýyr nuqsan kelýiniń aldyn alý maqsatynda jedel járdem kólikteriniń medıtsınalyq kómekti jedel kórsetýine járdemdesińizder ári kómektesińizder», - dedi Ajar Ǵınııat.