Densaýlyq saqtaýdy damytý ulttyq ǵylymı ortalyǵyna Salıdat Qaıyrbekovanyń esimi berildi
QR Úkimetiniń qaýlysymen «Densaýlyq saqtaýdy damytý respýblıkalyq ortalyǵy» ShJQ RMK «Salıdat Qaıyrbekova atyndaǵy Densaýlyq saqtaýdy damytý ulttyq ǵylymı ortalyǵy» ShJQ RMK bolyp qaıta ataldy.
DSDRO 1994 jyly Almatyda Densaýlyq saqtaýdyń medıtsınalyq jáne ekonomıkalyq problemalarynyń ǵylymı ortalyǵy bolyp quryldy.
Ortalyqtyń quqyqtyq mırasqory – Densaýlyq saqtaýdy damytý ınstıtýty Astanaǵa kóshirilip, 2011 jyly Respýblıkalyq aqparattyq-taldaý ortalyǵymen birigý arqyly Respýblıkalyq densaýlyq saqtaýdy damytý ortalyǵy ataýyn aldy.
Ortalyq qyzmetindegi mańyzdy baǵyttardyń bastaýynda Salıdat Qaıyrbekova turdy.
«Táýelsiz Qazaqstannyń densaýlyq saqtaý júıesiniń damý tarıhynda QR Densaýlyq saqtaý mınıstri Salıdat Zekenqyzy Qaıyrbekovanyń róli erekshe. Salıdat Zekenqyzy qatardaǵy dáriger-nevropatologtan bastap Qazaqstan Respýblıkasynyń Densaýlyq saqtaý mınıstrine deıin, elimizdiń densaýlyq saqtaý júıesiniń barlyq deńgeılerinen ótti. Tereń kásibı bilimi, uıymdastyrýshylyq qabileti, kóshbasshylyq qasıeti men jaýapkershilik, oılaý ótkirligi, qarapaıymdylyǵynyń arqasynda Salıdat Zekenqyzy QR Densaýlyq saqtaý júıesin damytý jolynda kúrdeli mindetterdi sheship, tıimdi komanda qura aldy, sondaı-aq medıtsınalyq ortada joǵary bedelge ıe bola bildi», - dep atap ótti QR Densaýlyq saqtaý mınıstri Alekseı Tsoı.
Qazaqstan Respýblıkasynyń alǵashqy Densaýlyq saqtaý áıel-mınıstri, QR Memleket jáne qoǵam qaıratkeri, densaýlyq saqtaý salasyndaǵy qaıratker, medıtsına ǵylymdarynyń doktory S. Qaıyrbekova óz ómirin halyqqa qyzmet etý jolyna arnady, otandyq densaýlyq saqtaý salasyna zor eńbek sińirdi.
«Densaýlyq saqtaý salasyndaǵy erekshe eńbegin baǵalap, S.Z. Qaıyrbekovanyń esimin máńgi saqtaý maqsatynda DSDRO ujymy Densaýlyq saqtaý mınıstrliginiń ardagerler keńesimen, sondaı-aq medıtsınalyq qoǵamdastyq ókilderimen birlese kele Ortalyqqa Salıdat Qaıyrbekovanyń esimin berý týraly qoldaýhatpen shyqqan bolatyn. Salıdat Zekenqyzy bergen durys baǵyttyń arqasynda Densaýlyq saqtaýdy damytý respýblıkalyq ortalyǵy ǵylymı negizdelgen taldaý, ozyq ınnovatsııalyq tehnologııalardy ázirleý jáne engizý, densaýlyq saqtaý salasynyń jumys isteýi men halyq densaýlyǵynyń jaı-kúıine taldaý júıesin qamtamasyz etý, salalyq aqparattyq júıeni damytý jáne eldegi menedjment ınstıtýtyn kúsheıtý boıynsha Qazaqstan Respýblıkasyndaǵy jetekshi uıymǵa aınaldy. Bul transformatsııa bizdiń ortalyq úshin damýdyń jańa kezeńi bolmaq», - deıdi Salıdat Qaıyrbekova atyndaǵy Densaýlyq saqtaýdy damytý ulttyq ǵylymı ortalyǵynyń basqarma tóraǵasy Kamaljan Nadyrov.
Ortalyq óz jumysy barysynda memlekettik baǵdarlamalardy, jol kartalaryn, salalyq jobalardy jáne túrli normatıvtik-quqyqtyq aktilerdi ázirleýge jáne ádisnamalyq iske asyrýǵa qatysa otyryp, otandyq densaýlyq saqtaý júıesin damytýǵa úlken úles qosty.
Sondaı-aq, medıtsınalyq qyzmetterdiń sapasy jónindegi birikken komıssııanyń jáne Formýlıarlyq komıssııanyń jumys organy retinde olardyń jumysyn saraptamalyq-taldamalyq súıemeldeýdi qamtamasyz etedi.
Ortalyq sonymen birge densaýlyq saqtaý salasyndaǵy kadr resýrstary jónindegi Ulttyq úılestirýshi mindetin atqarady.
Ortalyq DDU, AQSh Aýrýlardy baqylaý jáne aldyn alý ortalyqtary, Densaýlyq saqtaýdaǵy sapa jónindegi halyqaralyq qoǵam, BUU Balalar qory, Kanadanyń halyqaralyq densaýlyq saqtaý qoǵamy, Koreıanyń densaýlyq saqtaý ındýstrııasyn damytý ınstıtýty jáne basqa halyqaralyq seriktestermen yntymaqtasady.
Ortalyq aldyna jańa maqsat-mindetterdi qoıyp otyr.
Atap aıtqanda, olar - alǵashqy medıtsınalyq-sanıtarlyq kómekti ádisnamalyq súıemeldeý ortalyǵyn, Ulttyq jobalardy iske asyrý jónindegi jobalyq keńseni, klınıkalyq zertteýler jónindegi Úılestirý ortalyǵyn, tehnologııalyq quzyretterdiń salalyq ortalyǵyn qurý.
DSDRO-ny qaıta ataý protsesine memlekettik bıýdjetten qosymsha shyǵyn kózdelmegen.