Densaýlyq saqtaý salasynyń jaǵdaıy kúrdeli 6 aımaq bar – Ajar Ǵınııat

NUR-SULTAN. QazAqparat – Búgin vedomstvonyń alqa otyrysynda Densaýlyq saqtaý mınıstri Ajar Ǵınııat aımaqtarǵa jumys sapary jáne halyqpen kezdesý, azamattardy qabyldaý jáne vedomstvoǵa kelip túsken aryz-shaǵymdardy eskere otyryp, medıtsınalyq kómek sapasynyń standarttaryn óreskel buzatyn birqatar aımaqtar men medıtsınalyq uıymdardyń jumysyn qatań synǵa aldy.

Bul týraly QR Densaýlyq saqtaý mınıstrliginiń Facebook paraqshasynan málim boldy, dep habarlaıdy QazAqparat.

Jyl saıyn medıtsınalyq kómek sapasyna qatysty 5,6 myńnan asa aryz tirkeledi. Bıyl birinshi jartyjyldyqta osyndaı 2,8 myń aryz-shaǵym kelip túsken. Bul rette 30%-dan asa jaǵdaıda faktiler naqtylanady. Ókinishke qaraı, jaǵdaı jaqsy jaǵyna ózgerip jatqan joq.

«Birqatar óńir medıtsına qyzmetkerleriniń óz qyzmettik mindetterin oryndaýǵa salǵyrt qaraýy jáne medıtsınalyq uıymdardyń menedjementi nashar uıymdastyrylǵany baıqalady», – dep atap ótti óz sózinde Densaýlyq saqtaý mınıstri.

Mınıstr medıtsınalyq kómek kórsetý erejeleri men standarttaryn buzý jappaı sıpat alyp bara jatqanyna nazar aýdardy.

Aǵymdaǵy jyldyń 6 aıynda osy tektes 500-den asa jaǵdaı tirkelgen. Sondaı-aq Medıtsınalyq jáne farmatsevtıkalyq baqylaý komıteti kóbinese jaǵymsyz jaıttarǵa ákelip soǵatyn klınıkalyq hattamalardan negizsiz aýytqýǵa qatysty 1600-den asa faktini anyqtady.

Osylaısha, mınıstr atap ótkendeı, Komıtetke kelip túsken oryndy shaǵymdar boıynsha aımaqtardy saralaý nátıjesinde densaýlyq saqtaý salasyndaǵy ahýal máz emes 6 aımaq anyqtaldy.

Olar: kelip túsken shaǵymdardyń 59% naqtylanǵan Pavlodar oblysy (№1qalalyq aýrýhana, Ekibastuz qalalyq aýrýhanasy, Pavlodar qalasyndaǵy №3 emhana). Odan keıingi shaǵym kóp túsetin aımaqtar: Almaty oblysy (Іle, Talǵar aýdanynyń ortalyq aýrýhanasy, Qarasaı aýdanyndaǵy aýdanaralyq kópbeıindi aýrýhana) – 56,3%, Jambyl oblysy (Baızaq, Jambyl aýdandyq ortalyq aýrýhanasy, №5, №8 qalalyq emhanalar, Shý qalasynyń emhanasy) – 51%, Qyzylorda oblysy (Kópbeıindi qalalyq aýrýhana, Shıeli jáne Jańaqorǵandaǵy aýdanaralyq aýrýhana, №3 qalalyq aýrýhana) – 44,4%, Almaty qalasy (№4 qalalyq aýrýhana) – 35,7%, Mańǵystaý oblysy (Beıneý aýdandyq ortalyq aýrýhanasy) – 31,3%.