Densaýlyq saqtaý salasynda birkelki aqparattyq júıe joq – Ashat Aımaǵambetov

ASTANA. QazAqparat – Mindetti áleýmettik medıtsınalyq júıesin qarjylandyrý ádisin ózgertý qajet. Bul usynysty QR Parlamenti Májilisiniń áleýmettik-mádenı damý komıtetiniń tóraǵasy Ashat Aımaǵambetov «Jibek Joly» telearnasynyń kóshpeli stýdııasyna bergen suhbatynda aıtty, dep habarlaıdy QazAqparat tilshisi.

«Biz mindetti áleýmettik medıtsınalyq saqtandyrý júıesin synap otyrǵan joqpyz. Onyń jumysyn jetildirý baǵytynda naqty usynystar bildirip otyrmyz. Azamattarymyz MÁMS arqyly aýrýhanaǵa barsa, «qazir múmkindik joq, 1 aıdan keıin kel, 3 aıdan keıin kel» dep shyǵaryp salady. Al eger patsıent aqyly ótem dese sharýa tez sheshiledi. Bul ádiletsizdik. Bul jerde másele aýrýhanaǵa nemese dárigerge qatysty emes. Júıeni qarjylandyrýǵa baılanysty. Mysaly, qarjyny 5 naýqasqa ǵana bóledi, aýrýhanaǵa odan kóp 10-15 patsıent kelse, olardy kelesi aıǵa jazyp qoıady. Saldarynan kezek paıda bolady», - dedi Ashat Aımaǵambetov suhbat barysynda.

Halyq qalaýlysynyń aıtýynsha, MÁMS júıesin qarjylandyrý tásilin aýystyrý qajet.

«Kelesi másele - dárigerler júktemesi shamadan tys. Olar patsıentti qabyldaǵan ýaqytta kompıýterge úńilip otyrady, sóıtip otyrǵanda naýqasty qaraýǵa ýaqyty bolmaıdy. Sosyn dárigerdiń ústinen durys qaramady degen shaǵym túsýi múmkin. Bul jerde dárigerdiń kinási joq, másele júıege baılanysty. Bizde densaýlyq saqtaý salasynda birkelki aqparattyq júıe áli de joq. 30-40 júıe bar, dáriger onyń árqaısysyn ashyp, patsıent týraly málimetterdi engizip otyrǵanda ýaqyty ótip ketedi», - deıdi ol.