Densaýlyq saqtaý salasyna «Ericsson Nikola Tesla» platformasy nege engizilmedi

ASTANA. QazAqparat – Densaýlyq saqtaý mınıstrligi elimizde engizilýi tıis «Ericsson Nikola Tesla» platformasyna qatysty túsinik berdi, dep habarlaıdy QazAqparat tilshisi.

Ortalyq kommýnıkatsııalar qyzmeti alańynda ótken brıfıng barysynda Densaýlyq saqtaý vıtse-mınıstri Beıbit Esenbaevke kelesi suraq qoıyldy. «Ericsson Nikola Tesla» halyqaralyq kompanııasy elimizde óz platformasyn engizbek bolǵan. Atalǵan platforma nege iske qosylmaı qaldy ?».

«Atalǵan kompanııamen kelisimshart bar, elimizde jumys istegen. Keıin sotta is qozǵaldy, al kompanııa platformany iske qosa almady, ol qazir jumys istep turǵan joq», - dep jaýap berdi Beıbit Esenbaev tilshi saýalyna.

Vıtse-mınıstr BAQ ókiliniń «demek ol platforma jaramsyz ǵoı» degen naqtylaý suraǵyna «ıá» dep jaýap qatty.

Eske salsaq, buǵan deıin QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Ericsson Nikola Tesla kompanııasynyń densaýlyq saqtaý salasyna engizilmek bolǵan atyshýly platformasyna qatysty túsinik bergen edi.

«Ericsson Nikola Tesla usynǵan plaftormanyń aqparattyq júıelermen naqty ıntegratsııasy bolǵan joq. Biz onyń basqa tásilderin qarap, jyldamdyǵy tezirek bolatyn qylyp oılastyryp jatyrmyz. Qazir onyń neshe paıyz ıntegratsııalanǵanyn aıta almaımyn. Qazir ol jumys istep tur ma, joq pa, ony da aıta almaımyn. Biz onyń elementterin qoldanamyz», - degen edi vedomstvo basshysy B. Mýsın.