Densaýlyq saqtaý salasy sapaly bilim berý júıesinsiz jumys isteı almaıdy - Alekseı Tsoı
«Bizdiń medıtsınalyq ortalyq aýqymdy zertteý jumystaryn júrgizip jatyr. Osy salada Sizderdiń joǵary oqý oryndaryńyzben yntymaqtastyqqa múddelimiz. Óıtkeni, oqý ornynyń ǵylymı áleýeti joǵary. Biz úshin medıtsınalyq ýnıversıtettiń túlekteri – erekshe brend. Bul bilim ordasynan rasymen myqty dárigerler shyǵady.
QR PІB Medıtsınalyq ortalyǵy – bul úlken qurylym. Bizdiń mindetimiz – Memleket basshysynyń tapsyrmasyna sáıkes ınnovatsııalardy, jańa tehnologııalardy, onyń ishinde bilim berý tehnologııalaryn izdeýde jáne engizýde óńirlerge kómek kórsetý. Al, densaýlyq saqtaý salasy sapaly bilim berý júıesinsiz jumys isteı almaıdy», - dep atap ótti Alekseı Tsoı kezdesý barysynda.
Munan soń, QR PІB Medıtsınalyq ortalyǵynyń basshysy óńirdiń medıtsına qyzmetkerlerimen kezdesti.
Aıta keteıik, QR PІB MO-nyń quramynda Astanadaǵy biregeı ıadrolyq medıtsına ortalyǵy jáne Almatydaǵy ortalyq klınıkalyq aýrýhana, «Oqjetpes» emdeý-saýyqtyrý kesheni, sanıtarlyq-epıdemıologııalyq saraptama ortalyǵy, medıtsınalyq tehnologııalar jáne aqparattyq júıeler ortalyǵy, mektepke deıingi tárbıe men oqytýdyń ınnovatsııalyq praktıkalary bar «Qarlyǵash» balabaqshalar jelisi bar. 6 myńǵa jýyq joǵary bilikti maman jumys isteıtin uıymdarda Joint Commission International, ISO, GPP, IIac-mra standarttary engizilgen.
Buǵan deıin habarlaǵanymyzdaı, QR Prezıdentiniń Іs Basqarmasy Medıtsınalyq ortalyǵy bıyl elimizdiń barlyq óńirlerimen arada áriptestik baılanysty nyǵaıta túsýge basa mán berip otyr. Bul qadam Medortalyqtyń Aqtóbe oblysyndaǵy kúnderin ótkizýden bastaý aldy.
QR Prezıdenti Іs Basqarmasyna qarasty Medıtsınalyq ortalyqtyń Aqtóbe qalasyndaǵy kúnderi aıasynda medıtsınanyń eń ózekti máseleleri talqylanyp, ony sheshý joldary usynyldy.
FOTO: Aqtóbe oblysy ákiminiń baspasóz qyzmeti.