Densaýlyq saqtaý mınıstrliginiń ókilderi menıngıtpen baılanysty jaǵdaı týraly aıtty
2018 jyldyń basynan beri Qazaqstanda menıngokokk ınfektsııasyn juqtyrýdyń 60 jaǵdaıy tirkeldi. Olaryń arasynda 14 jasqa deıingi balalar boıynsha 21 jaǵdaı tirkelgen. 13 bala kóz jumdy, Almatyda - 6, Almaty oblysynda 4, Ońtústik Qazaqstan oblysynda- 2, Qyzylorda oblysynda1 jaǵdaı tirkeldi.
Densaýlyq saqtaý mınıstrliginiń ókilderi jaǵdaıdyń baqylaýda ekenin aıtty.
«Menıngokokk ınfektsııasy - ótkir ınfektsııaly aýrý ekenin nazarda ustaý qajet. Ol bakterııalar arqyly taraıdy jáne onyń túrli klınıkalyq kórinisteri bolady. Infektsııany negizinen naýqas adamdar men ózge de tiri tirshilik ıeleri taratady. Olardyń barlyǵynda klınıkalyq belgiler bolmaýy múmkin. Soǵan qaramastan olar menıngokokk ınfektsııasyn taratýshylar bolyp tabylady. Bul indet túri ádette qys jáne kúz mezgilinde kóp taraıdy»,-dep túsindirdi vedomstvo ókilderi.
Infektsııa jótel, túshkirý, áńgimelesý barysynda taraıdy. Infektsııa qozdyrýshylar ádette syrtqy ortada turaqsyz keledi. Mıkrob aýrý adammen uzaq ýaqyt ári jaqyn baılanysty bolǵan kezde joǵarǵy tynys alý joldaryndaǵy shyrysh qabaty arqyly keledi. Infektsııa juqtyryp, aýrýǵa shaldyqqanǵa deıingi merzim 1-den 10 kúnge deıingi aralyqty quraıdy. Naýqas adam aýrý juqtyrǵan alǵashqy kúnnen bastap-aq qaýip týdyrady.
Bul aýrýmen ádette 5 jasqa deıingi balalar jıi aýyrady. Óıtkeni olardyń ımmýndy júıesi tolyq qalyptaspaǵan. Al jasóspirimder men jastar ádette kóp ýaqyttaryn túngi klýbtar sııaqty halyq kop shoǵyrlanǵan jerlerde ótkizedi. Al mundaı oryndar men ondaǵy shylym shegý, bir ydystan sýsyn ishý sııaqty jáıtter aýrýdy juqtyrý qaýpin arttyra túsedi.
Menıngıt aýrýy birden bastalady. Aldymen adamnyń basy qatty aýyryp, júregi aınyp, 6-15 saǵattan soń denesi bórte bastaıdy. Dene qyzýy 39-40°S gradýsqa jetip, qaltyraıdy. Terisi bozaryp, álsireıdi, arqasy men qol-aıaǵynyń ushtary aýyra bastaıdy. Aýrý adam shóldep, asqa degen tábeti bolmaıdy. Sondaı-aq bul aýrý tumaý, angına sııaqty aýrýlarǵa uqsap, bilinbeı jeńil ótýi de múmkin. Ádette adam sýyq tıip, aýyryp, qatty sharshaǵan kezde adamnyń organızmi álsireıdi. Mine, osy kezde ınfektsııanyń taraýyna qolaıly jaǵdaı týyndaıdy jáne osy kezde menıgokokk adamnyń mıyna enip, ony qabyndyra túsedi.
Sondaı-aq Densaýlyq saqtaý mınıstrligi aýrýdyń aldyn alý týraly keńesterimen bólisti.
«Túrli mádenı is-sharalarǵa qatysýdy shektep, basseıinder men oıyn alańdaryna saýda ortalyqtaryna barýdy toqtatý kerek. Tazalyq saqtap, bólmeni jıi jeldetip, ylǵaldy tazalyq sharalaryn udaıy júrgizip otyrǵan jón. Sondaı-aq profılaktıkalyq maqsatta dárigerge jıi qaralyp otyrǵan durys. Tek qaınatylǵan sý ishken jón»,-deıdi vedomstvo ókilderi.