Densaýlyq saqtaý mınıstrliginiń menshigindegi 516 mln teńgeniń múlki Nazarbaev Ýnıversıtetine berilmek

ASTANA. QazAqparat – Densaýlyq saqtaý mınıstrliginiń menshigindegi qurylysy aıaqtalmaǵan nysandar «Nazarbaev Ýnıversıtetiniń» balansyna berilmek, dep habarlaıdy QazAqparat tilshisi.

«Osy qaýlynyń qosymshasyna sáıkes, QR Densaýlyq saqtaý mınıstrliginiń balansynan «Nazarbaev Ýnıversıteti» derbes bilim berý uıymynyń menshigine aıaqtalmaǵan qurylysqa arnalǵan shyǵyndar túrindegi respýblıkalyq múlik berilsin», - delingen Ashyq NQA portalynda jarııalanǵan Úkimet qaýlysynyń jobasynda.

Qujatqa qosymsha berilgen túsindirmede jazylǵandaı, múlikti oqý ornyna berý bastamasy byltyr anyqtalǵan mınıstrliktiń esep aýdıtindegi olqylyqtardy joıý úshin usynylyp otyr.

«Qaýly qabyldaý Densaýlyq saqtaý mınıstrliginiń teńgerimindegi múlikti «Nazarbaev Ýnıversıteti» derbes bilim berý uıymynyń menshigine berýdi júzege asyrýǵa jáne mınıstrliktiń 2022 jylǵy shoǵyrlandyrylǵan qarjylyq eseptiligi aýdıtiniń qorytyndylary boıynsha anyqtalǵan buzýshylyqty joıýǵa múmkindik beredi», - dep túsindirme berilgen qaýlyǵa.

Belgili bolǵandaı, endi «Nazarbaev Ýnıversıtetiniń» menshigine jalpy somasy 516 mln 911 myń 331 teńge bolatyn qurylysy aıaqtalmaǵan myna nysandar ótedi:

- 10 Kv elektrmen jabdyqtaý jelileri - 26 434 teńge;

- TP-10/0Kv jáne KL 6-10 Kv qurylysy - 24 267 667 teńge;

- Elektrlik montajdaý jumystary - 13 217 230 teńge;

- «Astana qalasynda 180 tósektik Ulttyq ǵylymı kardıohırýrgııalyq ortalyq» KeAQ jobalaý-smetalyq qujattamasy - 345 200 000 teńge;

- «Astana qalasynda bir aýysymda 500 adam qabyldaıtyn Respýblıkalyq dıagnostıkalyq ortalyq» AQ-nyń jobalaý-smetalyq qujattamasy - 134 200 000 teńge.

Úkimet qaýlysy 9 maýsymǵa deıin kópshilik talqylaýda bolady.