Densaýlyq saqtaý mınıstrligi jedel járdem qyzmetkerlerine túsinistikpen qaraýǵa shaqyrdy

NUR-SULTAN. QazAqparat – QR densaýlyq saqtaý vıtse-mınıstri Ajar Gınııat jedel járdem qyzmetkerleri shaqyrtý túsken jaǵdaıda jaǵymsyz jaǵdaılarmen jıi kezdesip jatqanyn málim etti, dep habarlaıdy QazAqparat tilshisi.

«Jedel járdem qyzmetiniń medıtsına qyzmetkerleri shaqyrtýlar kezinde jaǵymsyz emotsııalyq jaǵdaılarmen kóp kezdesedi. Olar óte joǵary fızıkalyq jáne psıhıkalyq jaǵdaıda jumys istep jatyr. Shaqyrtýlar boıynsha qyzmet kórsetý deńgeıi birinshi kezekte patsıentterdiń jaǵdaıynyń aýyrlyǵyna baılanysty anyqtalady. Sondyqtan medıtsınalyq qyzmetkerlerge renjimeı, óz kezekterińizdi kútkenderińiz durys», - dedi ol OKQ-da ótken baspasóz máslıhatynda.

Ajar Gınııattyń aıtýynsha, testileýdi júrgizý tóńiregindegi daýly jaǵdaı PTR-test tapshylyǵyna baılanysty emes. Osy ýaqytqa deıin Qazaqstanda 1,5 mln test júrgizilgen.

«Odan bólek qosymsha 1,2 mln test satylyp alynýda. Azamattardyń kópshiligi bir mezgilde júgingen jaǵdaıda PTR-analızatorlary bar 56 zerthananyń ótkizý qabileti jetkiliksiz bolyp otyr. Osyǵan baılanysty kezek qalyptasyp qalady. Osy jyly tamyz aıynyń sońyna deıin 20 PTR-analızator satylyp alynyp, zerthanalar sany kóbeıedi. Testileý dárigerlerdiń keńesi boıynsha ótkizilýi tıis», - dedi ol.