Densaýlyq saqtaý mınıstri Taldyqorǵandaǵy aýrýhanalardyń qurylysyn tekserdi

TALDYQORǴAN. QazAqparat - Búgin Densaýlyq saqtaý mınıstri Alekseı Tsoı Almaty oblysynyń Taldyqorǵan qalasyna baryp, Erkin aýylyndaǵy dárigerlik ambýlatorııanyń qurylysymen tanysty. Medıtsınalyq nysan bir aýysymda 100 azamatqa medıtsınalyq-sanıtarlyq alǵashqy kómek kórsete alady, dep habarlaıdy QazAqparat.

Vedomstvo baspasóz qyzmetinen málim etkendeı , sondaı-aq mınıstr modýldik juqpaly aýrýlar aýrýhanasynyń qurylys alańyna barǵan.

«Memleket basshysy Qasym-Jomart Toqaev Qazaqstan halqyna Joldaýynda jańa 13 juqpaly aýrýlar aýrýhanasyn salýdy tapsyrdy. Qazir óńirlerde ákimdikter 12 modýldik ınfektsııalyq aýrýhananyń qurylysyna jáne bıyl qazan aıynda paıdalanýǵa beriletin bir aýrýhanany qaıta jańartýǵa kiristi. Bul jumys pandemııanyń yqtımal ekinshi tolqynyna daıyndyq aıasynda júzege asýda jáne halyqty ýaqtyly, sapaly kómekpen qamtamasyz etýge múmkindik beredi», - dedi A.Tsoı.

Densaýlyq saqtaý mınıstri COVID-ortalyǵynyń jumysymen de tanysty, munda mamandar aýyr jáne óte aýyr jaǵdaıdaǵy naýqastarǵa keńes beredi, olardy emdeýdiń ádisterin qarastyrady. Ortalyq bıyl shildede ashylǵan.

KVI ekinshi tolqynyna daıyndyq retinde Almaty oblysyndaǵy aýrýhanalarda ókpeni jasandy jeldetýge arnalǵan 303 apparat bar. 15 qyrkúıekke qaraı olardyń sany 507-ge jetedi. Medıtsınalyq uıymdarda 634 ottegi kontsentratory bar. Jergilikti bıýdjet esebinen taǵy 100 dana jáne demeýshilik kómekpen 90 dana satyp alý jumystary júrgizilýde.

Medıtsınalyq uıymdarǵa ottegi stantsııasyn jáne 15 rentgen apparatyn ornatý úshin jergilikti bıýdjetten qosymsha 763 mln teńge bólinedi. Medıtsınalyq uıymdarda dári-dármek pen dezınfektsııalyq quraldardyń qory jetkilikti.

Óńirdegi ınfektsııalyq jáne provızorlyq statsıonarlarda dene qyzýyn túsiretin – 215 150, vırýsqa qarsy – 45 535 preparat, sondaı-aq 255 157 antıbıotık bar.