Densaýlyq saqtaý birinshi vıtse-mınıstri QazVac vaktsınasyn saldyrdy

NUR-SULTAN. QazAqparat - Búgin Densaýlyq saqtaý birinshi vıtse-mınıstri Marat Shoranov Nur-Sultan qalasyndaǵy № 9 emhana bazasynda Qazaqstanda ázirlenip, jasalǵan QAZVAC koronavırýs ınfektsııasyna qarsy vaktsınany saldyrdy. Bul týraly QazAqparat atalmysh vedomostvonyń baspasóz qyzmetine silteme jasap habarlaıdy.

Hattamaǵa sáıkes, M. Shoranov medıtsınalyq tekserýden ótip, dárigerdiń qorytyndysynan keıin egý kabınetine bardy. Reseılik «Spýtnık V» vaktsınasynan aıyrmashylyǵy, bir QAZVAC qutysy bir adamǵa arnalǵan.

Ekpe alǵannan keıin Densaýlyq saqtaý vıtse-mınıstri 30 mınýt medıtsınalyq baqylaýda boldy.

«Búginnen bastap qazaqstandyq vaktsınany bizdiń azamattarymyz saldyra alady. 50 myń dozalyq birinshi partııasy óńirlerge jóneltildi. Ózderińiz biletindeı, buryn meniń áriptesterim Ajar Ǵınııat pen Erlan Qııasov Spýtnık V vaktsınasyn birinshi bolyp saldyrǵan, búgin biz Densaýlyq saqtaý mınıstri Alekseı Vladımırovıchpen birge azamattarǵa preparattyń qaýipsiz ekenin kórsetý úshin otandyq óndiristiń vaktsınasyn aldyq», - dep atap ótti M.Shoranov.

Birinshi vıtse-mınıstr sonymen qatar qazirgi kezde ózine janama áserlerdiń joqtyǵyn, ózin jaqsy sezinetinin aıtty.

Esterińizge sala keteıik, Memleket basshysynyń 2021 jylǵy 26 qańtardaǵy tapsyrmasyn oryndaý maqsatynda halyqty jappaı vaktsınatsııalaýdy qamtamasyz etý úshin Bıologııalyq qaýipsizdik problemalary ǵylymı-zertteý ınstıtýty bazasynda qazaqstandyq COVID-19 vaktsınasynyń alǵashqy partııasy QazCovid-in (QAZVAC) shyǵaryldy.

«SQ-Farmatsııa» Biryńǵaı dıstrıbıýtorynyń habtaryna 50 myń doza kóleminde otandyq vaktsınanyń birinshi partııasy 23 sáýirde jetkizildi. Onyń ishinde 6 000 dozany Nur-Sultan men Almaty, 4 000 dozadan – Shymkent, Qaraǵandy, Shyǵys Qazaqstan jáne Almaty oblystary alady, qalǵan óńirlerge eki myń dozadan tıedi.
Mınıstrdi vaktsınatsııalaý barysy tikeleı efırde vedomstvonyń Facebook-tegi resmı paraqshasynda kórsetildi.