«Densaýlyq» poıyzy Almatydan saparǵa attandy

ASTANA. QazAqparat - Búgin Almaty-2 stansasynan «Densaýlyq» arnaıy mamandandyrylǵan medıtsınalyq poıyzy saparǵa attandy, dep habarlaıdy «Qazaqstan temir joly» UK» AQ baspasóz qyzmeti.

Poıyz 11 tamyzǵa deıin ońtústik óńirlerdi aralaıdy. Kóshpeli  emhananyń qyzmetine shalǵaı stansalar men jol aıyryqtarynyń turǵyndary men temirjolshylardy júginedi.

Mamyrdyń ortasynan beri soltústik óńirlerdi medıtsınalyq qyzmet túrimen qamtýǵa «Salamatty Qazaqstan» keńes berý jáne dıagnostıkalyq qyzmet poıyzy alys eldi mekenderdiń turǵyndaryna kómek kórsetýde.

Batys óńirdiń turǵyndaryna «Járdem» medıtsınalyq poıyzynyń dárigerler brıgadasy qyzmet kórsetýde.

«Shoqqaraǵaı stansasynda turamyn. 26 jyl jol jóndeýshi bolyp eńbek ettim. Qazir qurmetti eńbek demalysyndamyn. Mamandardyń dárigerlik tekserýinen óttim. Osyndaı poıyzdy uıymdastyrǵandarǵa alǵysym sheksiz», - deıdi Valentına Maksımovıch.

Arnaıy medıtsınalyq poıyz sońǵy úlgidegi dıagnostıkalyq jáne emdeý qurylǵylarymen, mını-otashylyq, zerthanalyq, telekommýnıkatsııalyq qondyrǵylarmen jabdyqtalǵan.

«Salamatty Qazaqstan» men «Járdem» medıtsınalyq poıyzdary 40 stansada bolyp, shalǵaı óńirdegi 39 myń turǵynǵa qolushyn sozdy.

Mamandar 13 myń medıtsınalyq jáne zerthanalyq saraptaýlar men 1 638 shaǵyn ota jasady. 1 784 adamnyń tisin emdedi.