Densaýlyq mınıstri: Ekpeden keıingi qaıǵyly jaıttardyń sebebi – sáıkestik

NUR-SULTAN. QazAqparat – QR Densaýlyq saqtaý mınıstri Alekseı Tsoı Azattyq Rýhy portalyna bergen suhbatynda vaktsınadan keıin tirkelgen ólim-jitim jaıttaryna qatysty pikir bildirdi, dep habarlaıdy QazAqparat tilshisi.

«Jalpy alǵanda vaktsınadan bolǵan qaıǵyly jaǵdaı tirkelgen joq. Adamdar birinshi jáne ekinshi dozasyn da alyp jatyr. Vaktsına alý kezinde týyndaǵan ár jaǵdaı boıynsha tutas bir komıssııa qurylyp, tekseredi. Bul jerde qaıǵyly jaıttar men ekpeniń sáıkes kelgen jaǵdaılary ekenin túsingen óte mańyzdy. Elestetip kórińiz. Elimizde eresek halyqtyń 7,5 mıllıony ekpe alyp qoıǵan. Koronavırýsqa deıin de kún saıyn ınfarkten 5 adam, ınsýltten 10 adamǵa deıin, ózge aýrýlardan kún saıyn adamdar qaıtys bolatyn. Olar sozylmaly aýrýlardyń áserinen, ilespe asqynýlardyń saldarynan, qan qysymynyń kóterilýinen buryn da qaıtys bolyp jatatyn. Sol tendentsııa qazir de ózgerip jatqan joq», - dedi mınıstr.

Onyń aıtýyna qaraǵanda, mundaı jaǵdaılar psıholoıgıalyq turǵyda vaktsına alǵan kezben baılanystyrylady da, azaattar birden vaktsınadan kóre bastaıdy.

«Biraq sáıkestik bolǵan jaıttardyń bárinde ekpe alǵan adamnyń sozylmaly aýrýy, qysymy joǵary bolǵanyn nemese mıynda aqaýlar bolǵanyn kórdik. Sondyqtan, aýrýdyń sozylmaly anamnezi bolǵan. Osyndaı jaıttyń árqaısysyn biz jeke qaraımyz. Árbir osyndaı jaǵdaı boıynsha naqty reglament bar», - dedi vedomstvo basshysy.