Densaýlyq kerýeni: Aqmola oblysynyń shalǵaı aýlyna medıtsınalyq kómek kórsetildi
Partııa belsendileri epıdemıologııalyq kezeńde elimiz boıynsha 200 den astam aýyldaǵy medıtsınalyq qyzmet sapasyna monıtorıng jasap, kóptegen aýyldyq eldi mekenderde bul salanyń kemshin tustaryn anyqtady. Ásirese ońtaılandyrý jyldaryndaǵy qysqartýlardan keıin kóptegen aýyldar dárigersiz qalǵan.
Eki-úsh nemese tórt aýylǵa bir feldsherdiń qyzmet kórsetýi qalypty jaǵdaıǵa aınalǵan. Búgin partııalyqtar aýyldardarda indettiń aldyn alý jáne shalǵaı aýyl turǵyndaryna qoldaý kórsetý maqsatynda Aqmola oblysy, Atbasar aýdany, Esenkeldi aýylyna arnaıy «Densaýlyq kerýenin» uıymdastyrdy. Esenkeldi oblys ortalyǵynan shalǵaı ornalasqan aýyl. Kórshiles Sochınsk aýyly men Esenkeldi turǵyndaryna bir feldsher qyzmet kórsetedi. Aýyl turǵyndarynyń tolyqqandy medıtsınalyq tekserýden ótip, emdelýge múmkindikteri joq. Sol sebepti «Aýyl» partııasynyń belsendileri Nur-Sultan qalasynan bilikti dárigerlerdi alǵyzyp, Esenkeldilikterdi jappaı medıtsınalyq tekserýden ótkizdi. Atap aıtqanda turǵyndarǵa hırýrg, gınekolog, terapevt, balalar dárigeri, kardıolog qabyldaý júrgizdi jáne ÝDZ-dan ótkizip, flıýorografııaǵa túsirdi.
«Aýylymyzda medıtsına jaǵdaıy máz emes, eki aýylǵa bir feldsher qyzmet kórsetýde. Turǵyndarǵa da, dárigerimizge de ońaı emes. Al búgin «Densaýlyq kerýeni» kelip jappaı qabyldaý ótkizip, jaqsy boldy. Ózim gınekologtyń qabyldaýynda boldym, qarady ÝDZ-ge joldama berdi. Emdelý joldaryn aıtyp, dáriler jazyp berdi. Ádette biz dárigerge qaralýǵa oblys ortalyǵyna nemese Elordaǵa baratyn edik. Bilikti dárigerlerdiń osyndaı shalǵaı aýylǵa kelgenine aýyl turǵyndary dán razymyz», - deıdi aýyl turǵyny kóp balaly ana Gúlbarshyn Esenova.
Elordadan kelgen dárigerler syrqattanǵan aýyl turǵyndaryna emdik sharalar taǵaıyndap, COVID-19 indetiniń aldyn alý boıynsha keńester berdi.
«Aýyldardaǵy kúrde másellerdiń biri dárigerge qaralý, em-dom alý. Osyny eskerip «Aýyl» partııasy demeýshilerdiń qoldaýymen búgingi «Densaýlyq kerýeni» aktsııasyn uıymdastyryp otyr. Aldaǵy ýaqytta da jalǵasyn tabady degen oıdamyz», - dedi «Aýyl» Halyqtyq-demokratııalyq patrıottyq partııasy Ortalyq apparatynyń jetekshisi Qýanysh Seıtjanov.