Densaýlyq saqtaý mınıstrligi medıtsına qyzmetkerlerin qorǵaýǵa qatysty bastama kóterdi

<p>ASTANA. KAZINFORM &ndash; Densaýlyq saqtaý mınıstrligi kásibı mindetterin oryndaý barysynda medıtsına qyzmetkerlerine birneshe ret shabýyl jasaýyna baılanysty medıtsına mamandarynyń qyzmetine kedergi keltirip, olarǵa zorlyq-zombylyq kórsetkeni úshin qylmystyq jaýapkershilikke tartýdy engizýdi usyndy.</p>

2019 jyldan beri medıtsına mamandaryna 161 ret shabýyl jasaý faktileri tirkeldi. Al, bıyl mamyr aıynda Almatyda jedel járdem feldsherine ony shaqyrǵan adamdar qol kóterip, páterinde qamaǵan. Qaraǵandyda qyzmettik mindetterin oryndaý barysynda jedel járdem qyzmetkerin aıaýsyz uryp-soqqan. Temirtaýda da jedel járdem kóliginiń júrgizýshisi taıaq jep, tonalǵan.

Búgingi tańda olarǵa qol tıgizýden qorǵaý qoldanystaǵy zań aıasynda júrgiziledi (Qylmystyq kodeks jáne Ákimshilik quqyq buzýshylyq týraly kodeks). 

Dárigerlerdi qorǵaýdy kúsheıtý maqsatynda mınıstrlik medıtsına mamandarynyń kásibı qyzmetine kedergi keltirgeni jáne olarǵa qarsy qylmystyq áreketter boıynsha qylmystyq jaýapkershilikke tartýdy engizýge bastama kóterdi. Sol úshin 2024 jyldyń 12 sáýirinde densaýlyq saqtaý salasyndaǵy qyzmetkerlerdiń qaýipsizdigin qamtamasyz etý boıynsha Keshendi jospar bekitildi. 

Bas prokýratýramen birlese Qylmystyq kodekske ózgerister ázirlendi, onda medıtsına mamandaryna qatysty zorlyq-zombylyq áreketteri úshin qylmystyq jaýapkershilik qarastyrylǵan. Qylmystyq kodekske «Medıtsına qyzmetkeriniń zańdy qyzmetine kedergi keltirý» jáne «Medıtsına qyzmetkerine qatysty zorlyq-zombylyq kórsetý» degen jańa baptar engizý usynylýda. 

– Bul qadamdar medıtsına qyzmetkerlerin qorǵaýǵa jáne qaýipsiz jumys ornyn qurýǵa baǵyttalǵan, - dep atap ótti densaýlyq saqtaý mınıstrligi. 

Eske salsaq, buǵan deıin Óskemende quqyq buzýshyny ustaǵan jedel járdem qyzmetkerleri marapattalǵanyn jazǵan edik.