Densaýlyq saqtaý mınıstri ombylap qar keshken aqtóbelik feldsherlerge alǵysyn bildirdi

<p>AQTÓBE. KAZINFORM &ndash; Elimizdiń jańa taǵaıynalǵan Densaýlyq saqtaý mınıstri Aqmaral Álnazarova omby qarda shaqyrtýǵa barǵan feldsherlerdiń eńbegin baǵalap, alǵys aıtty.</p>

Aqtóbe oblysy Hromtaý aýdanynda júregi syr bergen naýqasqa barǵan feldsherlerdiń eńbegin mınıstrdiń ózi baǵalady. Sol kúni jedel járdem brıgadasynyń kóligi qar basqan kóshege kire almaı, úsh maman jarty jolda jaıaý shyqqan. Borandy kúni ombylap, uzaq júrýge týra kelgen. Olardyń bul eńbegi elendi.

- Kez kelgen aýa raıynda, aıaz ben boranda, jol joq jerde jedel járdem brıgadalary tótenshe jaǵdaılarǵa qaramastan adamdardyń ómirin saqtap qalý qajet mıllıondaǵan shaqyrtýǵa qyzmet kórsetedi. Osyndaı batyrlardyń qatarynda – Hromtaý aýdanynyń jedel járdem feldsherleri Qudııarov Baýyrjan Sultanhanuly, Tileý Qaırat Berikuly, Rysbaı Saıa Ybyraıqyzy bar. Olar omby qarǵa qaramastan júrek ustamasymen aýyratyn naýqasqa jetip, ózderiniń asyl kásibine adaldyqtary men kúsh-jigerlerin tanytty. Dárigerlerdiń aıtýynsha, sol jerde kardıogramma jasalyp, usynymdar berildi, sátin salǵanda patsıent emdeýge jatqyzýdy qajet etpedi. Densaýlyq saqtaý mınıstrligi Hromtaý aýdanynyń jedel járdem brıgadasy feldsherleriniń qajyrly eńbegin atap ótedi. Ártúrli qıyndyqtardy jeńe otyryp, naýqastardyń ómirin saqtap qalatyn barlyq medıtsına qyzmetkerlerine alǵysymyzdy bildiremiz,- dep jazdy Densaýlyq saqtaý mınıstri Aqmaral Álnazarova áleýmettik jelidegi paraqshasynda.

Osyǵan deıin Aqtóbe oblysy Hromtaý aýdanynda jedel járdem qyzmetkerleri shaqyrtýǵa jarty joldan jaıaý barǵany týraly materıal jarııalaǵan edik.