Denıs Tenniń synyptasy qaıǵyly oqıǵadan buryn ne bolǵanyn aıtyp berdi
Rýslan Denıs Tenmen sońǵy ret «Gedonıst» meıramhanasynda birge túski as ishken.
«Men ony túski asqa shaqyrdym.18 maýsymda Panfılov kóshesimen kele jatqanda Denısti kórgenmin. Sosyn ekeýmiz sóılestik. Ol kafe sekildi bıznes ashqysy kelgenin aıtty. Kelesi kúni men oǵan kele alasyń ba dep jazdym. Ol 15 mınýtta kelemin dedi. Men aspazdarǵa dəmdirek tamaq daıyndaýdy tapsyrdym. Sosyn Denıs, marketolog Madına, Əljan esimdi seriktesim tórteýimiz kóńildi otyrdyq. Sońynda Denıs bərimizben qoshtasyp shyǵyp ketti. 10 mınýttan soń eden jýatyn əıel bireýdi pyshaqtap ketti dep úreılenip keldi. Men qyzmetkerler tóbelesken shyǵar dep oıladym. Bərimiz dalaǵa júgirip shyqtyq. Sosyn men myna sumdyqty kórdim»,- dedi Haırýllaev.
Kýəgerdiń aıtýynsha, Denıs jatqan jerde qan óte kóp bolǵan. Onyń qasynda aspaz, barmen, qyzyl kóılektegi qyz, eki polıtsııa qyzmetkeri boldy.
«Men jedel jərdemmen birge barmaǵan sebebim bar. Maǵan polıtsııa oqıǵa ornynda qalyp, kameralardy tekserýdi tapsyrdy»-, dedi ol.
Otyrys barysynda Denıstiń anasy Oksana Ten synyptasynan Denısti ne úshin shaqyrǵanyn túsindirýdi surady.
«Meniń belgili bir maqsatym bolǵan joq. Men tek tərbıem solaı bolǵasyn shyǵar, ony tamaqqa shaqyrǵym keldi. Osy ýaqytqa deıin shyǵaryp salmaǵanyma ókinemin. Denıs esinen tanyp jatty. Men ony jedel jərdemge mingizer kezde dərigerlerdiń Denıske bir dəri ekkenin kórdim. Odan soń ol demalǵandaı boldy. Sondyqtan, men ony óledi dep oılamadym»,- dedi ol.
Sonymen qatar, sot otyrysynda meıramhana qyzmetkerleri barmen, marketolog mamandarynan suraq-jaýap alyndy.
Sot aldynda úsh adam jaýap berýde. Olar - QR QK 434-baby, QR QK 24-babynyń 3-bólimi, 188-babynyń 2-bóliminiń 1- tarmaǵy boıynsha aıyptalǵan Janar Tolybaeva, QR QK 188-babynyń 2-bóliminiń 1 tarmaǵy, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Arman Qudaıbergenov, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Nuraly Qııasov. Qylmystyq is 38 tomnan turady.
Eske salsaq, Denıs Tendi bıyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denıs Tenniń ólimine qatysty qylmystyq is qozǵalyp, kúdiktiler izdestirildi. Elbasy Denıs Tenge qatysty qylmysty muqııat tekserýdi tapsyrdy. Keıin QR ІІM kúdiktilerdiń ustalǵanyn jarııa etti.