Denıs Tenniń stsenarııi boıynsha túsirilgen fılm Qazaqstan men Ońtústik Koreıada kórsetiledi

ALMATY. QazAqparat – Tanymal qazaqstandyq mánerlep syrǵanaýshy Denıs Tenniń stsenarııi boıynsha túsirilgen «Soqyr mahabbat» fılmi 28 shildeden bastap prokatqa shyǵady. Fılmniń bas prodıýseri Tımýr Bekmambetov pen sportshynyń anasy Oksana Ten, dep habarlaıdy QazAqparat tilshisi.

Sıýjet boıynsha, qyz ben jigit áleýmettik jelide tanysyp, bir-birine ǵashyq bolyp qalady. Keıin qyzdyń kereń-mylqaý, al jigittiń kózi kórmeıtini anyqtalady. Fılmde áleýmettik jeli kez kelgen tosqaýyldy joıyp, shynaıy mahabbatqa jol beretini kórsetilgen.

Denıs Ten stsenarııdi 2018 jyly Tımýr Bekmambetovtiń kınokompanııasy atynan Screenlife Contest baıqaýyna qatysý úshin jazǵan. Ótinishin jasyryn joldap, fınalıster qatarynan kórindi.

«Men Denıske pıtchıngke qatysý ıdeıasy týraly aıttym. Sosyn ol jasyryn túrde ótinish berdi. Baıqaýǵa álemniń túkpir-túkpirinen 250-den astam ótinim túsken. Nátıjesinde Máskeýde ótken halyqaralyq baıqaýda Denıs jeńimpaz atandy. Biz túsirilimdi Los-Andjelesten bastaýdy josparlap qoıǵan edik. Bul qaıǵyly oqıǵadan bir aı buryn bolǵan edi. Keıin Denıstiń anasymen birge bul fılmdi túsirý kerek dep sheshtik», - deıdi Denıstiń dosy, atqarýshy prodıýser Igor Tsaı.

Túsirilim 2019 jyldyń basynda bastalyp, úsh aıǵa sozyldy. Rejısser Venetsııa kınofestıvaliniń jeńimpazy Chak Che boldy. Halyqaralyq fılmdi túsirýge qazaqstandyq mamandar da belsene atsalysty.

Igor Tsaıdyń aıtýynsha, fılm el nazaryna 28 shildeden bastap jol tartpaq. Sonymen qatar kúzde Ońtústik Koreıada prokatqa shyǵady.

Aıta keteıik, kıno týyndynyń stsenarısi Denıs Ten osydan 4 jyl buryn 25 jasynda pyshaq jaraqatynan qaza bolǵan edi.

Eske salaıyq, mánerlep syrǵanaýshy Denıs Ten 2014 jyly Sochıde ótken Olımpıada oıyndarynyń qola júldegeri atanǵan bolatyn.

Ashyq kózderden alynǵan foto