Denıs Tenniń ólimi boıynsha aıyptalǵandar kisi óltirgenin moıyndamady
Búgingi otyrysta prokýror Qýandyq Dosov sottalýshylarǵa qatysty aıyptaý aktisin oqydy.
«2018 jyly maýsymda bótenniń múlkin jymqyrý maqsatymen sottalýshy Qudaıbergenov Shagabýtdınov Shevchenko kósheleriniń qıylysynda turǵan Jańqabaevtyń Lexus kóliginiń aınasyn alyp ketken. Osylaısha oǵan 608 myń teńge kóleminde shyǵyn keltirdi. Óziniń qylmysyn jasyrý maqsatynda ol aınalardy Shańyraqtaǵy saıǵa laqtyryp ketken. Sonymen qatar, Qudaıbergenov 11-shildede zańsyz jolmen aqsha tabý maqsatynda Astanadaǵy kúıshi Dına kóshesinde Shəmshıevtiń kóliginiń aınasyn sheship ketken. Osyǵan baılanysty Qudaıbergenovke QR QK 188-baby boıynsha aıyp taǵyldy. Keıin Qııasov pen Tolybaeva, Qudaıbergenov úsheýi «Magným» saýda úıinen as úı pyshaǵyn, qolǵap satyp alǵan.
19-shilde kúni Qurmanǵazy kóshesinen shyǵysqa qaraı Baıseıitova kóshesinde LEXUS 708 02 nómirli kóliginiń turǵanyn baıqaǵan. Olar kólikterin «Dostyq» qonaq úıiniń qasyna qaldyryp, Tenniń avtokóligine qaraı jaıaý jaqyndaǵan. Tolybaeva jan-jaǵyna qarap, adamdardyń qarasy azaıýyn, yńǵaıly sətti kútip, 7 metr ara qashyqtan aımaqty baqylap turǵan. Qudaıbergenov bolsa kóliktiń aınasyn shyǵaryp alyp, kólik ıesine 199 myń teńge shyǵyn keltirgen. Sol sətte Denıs Ten Tolybaevanyń qasynan ótip, kóliginiń janynda turǵan bóten adamdy kóredi. Onyń kólik aınasyn urlyq jasap jatqanyn baıqaǵan soń aınasyna jarmasa ketken. Qudaıbergenov sol sətte Baıseıitova kóshesine qaraı qasha jónelgen. Ten kóp uzamaı ony qýyp jetken. Sol kezde Qudaıbergenov pen Ten arasynda tóbeles bastalǵan. Qudaıbergenov shalbarynyń belbeýin alyp Tenniń betinen ura bastaǵan. Sol sətte Qııasov rıýkzaktan pyshaqty alyp art jaǵynan kelgen. Qııasov ózderiniń qylmysyn jasyrý maqsatynda adam óltirý qylmystyq oı pıǵyly paıda bolǵan. Qudaıbergenov Tendi ustaı turady. Sol kezde Qııasov Denıs Tenniń oń jaq sanynyń arterııasynyń joǵarǵy tusynan eki ret pyshaq saldy. Ten alǵan jaraqatynan sol jerde qaıtys boldy»,- dedi memlekettik aıyptaýshy Qýandyq Dosov.
Prokýror Arman Qudaıbergenovke QR QK 192-babynyń 2-bólimi, QR QK 188-baby, QR QK 99-babynyń 2-bólimi boıynsha aıyp taǵylǵanyn aıtty. Al Qııasovqa QR QK 192-babynyń 2-bólimi, QR QK 2-bólimi, 7-8 tarmaǵy boıynsha aıyp taǵyldy.
Memlekettik aıyptaýshy Janar Tolybaevaǵa QR QK 188-baby men QR QK 434-baby negizinde aıyp taǵylǵanyn jetkizdi.
Al sottalýshylar Arman Qudaıbergenov pen Nuraly Qııasov ózderine taǵylǵan adam óltirý aıybymen kelispeıtinderin aıtty.
«Men urlyq jasaǵanymdy moıyndaımyn. Qaraqshylyq pen adam óltirý qylmysyn jasaý oıymda bolǵan joq. Jańqabaev pen Shəmshıevtiń, Tenniń aınasyn alǵanymdy moıyndaımyn»,- dedi Qudaıbergenov.
Qııasov ta óz qylmysyn moıyndaǵan joq.
Sottalýshy Janar Tolybaeva QR QK 188-babyn 30-bapqa aýystyrýdy ótindi. Onyń aıtýynsha, ol qylmysqa bara jatqanyn bilmegen.
«434-bapty da moıyndamaımyn. Sebebi, men pyshaq salyp jatqanyn kórgen joqpyn»,- dedi Janar Tolybaeva.
Munyń aldyndaǵy otyrysta qos tarap aldyn ala tyńdalym barysynda óz talap aryzdaryn aıtqan bolatyn.
Oksana Tenniń quqyǵyn qorǵaýshy Nurlan Óstemirov Denısti bireýler tapsyryspen óltirýi múmkin degen oımen isti qaıta tergeýge jiberýdi suraǵan bolatyn.
Sýdıa sot zalynan tys keńesý bólmesinde keńesýden soń isti prokýratýraǵa qaıta tergeýge jiberý qajettiligi joq dep sheshti.
Sonymen qatar, jábirlenýshi tarap Denıstiń urylarmen jaǵa jyrtysyp jatqanyn eki polıtseı kórgenin aıtty.
Sottalýshy Janar Tolybaeva óziniń júktiliktiń 6,5 aılyǵynda ekenin məlimdegen bolatyn.
Eske salsaq, Denıs Tendi bıyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denıs Tenniń ólimine qatysty qylmystyq is qozǵalyp, kúdiktiler izdestirildi. Elbasy Denıs Tenge qatysty qylmysty muqııat tekserýdi tapsyrdy.
Keıin QR ІІM kúdiktilerdiń ustalǵanyn jarııa etti. Al, qyrkúıek aıynyń sońynda Іshki ister mınıstri Qalmuhanbet Qasymov atalmysh qylmystyq istiń tergelýine qatysty málimet bergen bolatyn.
25-jeltoqsanda Almatynyń qylmystyq ister boıynsha aýdanaralyq mamandandyrylǵan sotynda belgili sportshynyń ólimi boıynsha aldyn ala sot tyńdalymy ótti.