Denıs Tenniń ólimi barsha sport úshin aýyr qaıǵy - Halyqaralyq konkıshiler odaǵy

ASTANA. QazAqparat - Halyqaralyq konkıshiler odaǵy (ISU) qazaqstandyq mánerlep syrǵanaýshy Denıs Tenniń ólimi orny tolmas qaıǵy dep málimdedi. Bul týraly ISU tehnıkalyq komıtetiniń tóraǵasy Aleksandr Kıbalkoǵa silteme jasap TASS habarlaıdy.

Aıta keteıik, Sochı Olımpıadasynyń júldegeri, mánerlep syrǵanaýshy Denıs Ten búgin Almatyda urylardyń qolynan qaza tapqan bolatyn.

«Bul týraly aıtýdyń ózi aýyr. Onyń Sochıdegi ónerin kórgenmin, oǵan burynǵy otandasym retinde jankúıer boldym. Men de Qazaqstanda týdym. Bul jan túrshigerlik oqıǵa, orny tolmas ókinish. Barsha konkıshiler, búkil sport úshin zor qaıǵy. Quqyq qorǵaý organdary qaskóılerdi tabady dep senemin. Búkil Qazaqstanǵa, Denıstiń otbasyna qaıǵysyna ortaqtasa kóńil aıtamyn», - deıdi Kıbalko. 


Foto:Sergeı Bobylev/TASS