Denıs Tenniń memorıalyna kraýdfandıngpen qansha qarjy jınalǵany belgili boldy

ALMATY. QazAqparat - Start-time.kz platformasynda ashylǵan Denıs Tenniń memorıal ınstalıatsııasy kraýdfandıngine 200 myń teńgeden astam aqsha jınalǵan. Bul týraly belsendi toptyń jetekshisi, ıdeıa avtory Azıza Ótegenova Feısbýktegi paraqshasynda jarııalady, dep habarlaıdy QazAqparat tilshisi.

«10 mıllıon teńgege josparlanǵan memorıal úshin eki kúnniń ishinde 200 000 teńge jınaldy. Dál osy qalyptan taımasaq 100 kúnniń ishinde oılaǵan somany shyǵara alamyz. Kraýdfandıng ýaqyty 70 kúnnen soń aıaqtalady. Sondyqtan belsendirek bolaıyq. Bul aktsııaǵa kórshi Reseıden atsalysyp jatqandar da bar. Qazaqstandyqtardyń qalys qalmaýyn suraımyn. Denıs bizdiń qaharmanymyz. Onyń beınesin halyq úshin, bolashaq urpaq aldynda qaldyrý bizge amanat!», - delingen Azıza Ótegenovanyń jazbasynda.

 

Medeý muz aıdyny basshylary óz aýmaǵynda qazaqstandyq mánerlep syrǵanaýshy Denıs Tenniń eskertkishin qoıýdy quptap otyr. Alaıda jobany júzege asyrý úshin qala ákimdiginiń ruqsaty kerek.

«Áli kúnge deıin ákimdikpen kelisim júrip jatyr. Qala ákiminiń orynbasarynyń demalystan shyqqanyn kútip otyrmyz. Shildeniń 29-y habaryn aıtamyz», - dedi Medeý muz aıdynynyń marketıng dırektory Áıgerim Nııazbekova.

Qaıyrymdylyq aktsııasyna atsalysý úshin Start-time.kz platformasyna ótý kerek. 

Eske salsaq, Almaty turǵyny Denıs Tenniń memorıal ınstalıatsııasyna qarjy jınaý úshin onlaın platformasyn iske qosqan edi. Ideıa avtory Azıza Ótegenova QazAqparat tilshisine eskertkish jobasyn aıtyp bergen bolatyn.