Denıs Tenge ornatylatyn eskertkish jobasy qandaı bolmaq

ALMATY. QazAqparat - Qazaqstandyq mánerlep syrǵanaýshy Denıs Tenniń qurmetine Almatyda qoıylady dep josparlanǵan eskertkish týraly osy ıdeıa avtory Azıza Ótegenova QazAqparat tilshisine aıtyp berdi.

Qazaqstandaǵy Starttime.kz  kraýdfandıng platformasynyń bas dırektory Azıza Ótegenovanyń aıtýynsha, jobaǵa at salysýǵa 500 adam nıet bildirip otyr. Jańa ınstallıatsııanyń quny 10 mln teńgeni quraýy múmkin.

«Bul ıdeıa habarlaǵannan keıin birneshe saǵattan soń-aq kóp adamdardan qoldaý tapty. Denıstiń ólimi barshamyzǵa ortaq qaza. Onyń beınesin joǵaltpaý bizge amanat. Bastapqy baǵany 10 mıllıon teńge dep belgiledik. Máselen Almatydaǵy Vıktor Tsoıdyń memorıalyna 100 myń dollar jınalǵan. Máskeýlik músinshilermen habarlastym, olardyń aıtýynsha,  mundaı eskertkish jobasy shamamen 2 mln rýblge shyǵady eken. Osy málimetterge súıene otyryp baǵany bekittik. Ári qaraı kóre jatarmyz »,-dedi Azıza Ótegenova.

Memorıaldyń beınesi qandaı bolatyny ázirge belgisiz. Alaıda  onyń qasiret eskertkishi bolmaıtyndyǵy, kerisinshe kreatıvke toly motıvatsııalyq músin bolatyny anyq.

«Bul ádettegideı mármar tastan jasalatyn, gúl shoǵyn qoıyp qaıǵyryp qaıtatyn músin emes. Jastardyń mánerlep syrǵanaýǵa degen yqylasyn oıatatyn, kreatıvti ınstallıatsııa bolmaq. Ol hrýstaldan jasalǵan konkı  nemese qoladan quıylatyn beıne bolýy múmkin. Bul úshin  dızaınerler arasynda baıqaý uıymdastyrǵaly jatyrmyz. Sonda el ózi jınap bergen aqshasyn ózi tańdaǵan jobaǵa jumsaıdy. Halyqtyń daýysyna salamyz»,-dedi A.Ótegenova.  

Uıymdastyrýshynyń aıtýynsha, qazaqstandyq músinshiler arasynan tegin kómegin usynǵandar bolǵan. Biraq ol ınstallıatsııa avtoryn  Máskeý sheberleriniń arasynan izdepti. 

«Men bul ıdeıam úshin eshkimniń eńbegin tegin paıdalanǵym kelmedi. Bir adamǵa ǵana aýyrlyq túsirýdi qalamaımyn. Halyq arasynda músin syzbasyn daýysqa salyp, ony Máskeýlik sheberge jasatýdy jón kórdim»,-dedi ıdeıa avtory. 

Onyń sózinshe  aqshanyń bastapqy  bóligi syzba shyǵynyna ketedi.  Ekinshi bóligi qajetti materıalǵa jumsalsa, úshinshi bóligi eskertkishtiń jumysyna tólenedi. 

«Dızaınerler arasynan tańdalǵan jumysty avtory syıǵa tartsa jaqsy bolar edi. Aqshanyń kóp bóligi qalǵan  jumystarǵa  artylyp qalar edi. Baıqaýǵa qatysýǵa tek qazaqstandyqtardy ǵana emes, sonymen qatar shet eldik ónerpazdardy shaqyramyz. Sonda bul halyqaralyq nysanǵa  aınalýy múmkin»,-dedi ol.

Eske sala ketsek, almatylyqtar Denıs Tenniń eskertkish ornatý úshin qarajat jınamaq bolǵan edi.