Denıs Tendi eske alýǵa arnalǵan ІІІ halyqaralyq týrnır aıaqtaldy

ALMATY. QazAqparat – Búgin Almaty qalasynda bıylǵy ISU Challenger-diń 7-kezeńi sanalatyn Denıs Tendi eske alýǵa arnalǵan ІІІ halyqaralyq týrnır máresine jetti. Bul básekede eki qazaqstandyq mánerlep syrǵanaýshy júldege ıe boldy, dep habarlaıdy QazAqparat kazsports.kz saıtyna silteme jasap.

Erler arasyndaǵy jekeleı synda Dıas Jırenbaev qysqa jáne erkin baǵdarlamany qosqanda 192,67 upaı jınady. Qazaqstandyq sportshy tek grýzın Nıka Egadzege (208,47 ball) ese jiberdi. Úzdik úshtikti ázirbaıjandyq Vladımır Lıtvıntsev (188,77) túıindedi. Bul synda Rahat Bralın 4-satydan kórindi (181,22 upaı). Qalǵan qazaqstandyqtardyń nátıjesi: Oleg Melnıkov – 6-oryn (162,30), Elıseı Volkov – 8-oryn (101,96).

Al, áıelder arasynda ońtústik koreıalyq Mınche Kım eshkimge des bergen joq (158,84 upaı). Otandasymyz Anna Levkovets qysqa baǵdarlamadan keıingi ornyn jalpy esepte de saqtap qalyp, kúmis medalge qol jetkizdi (145,43 upaı). Qola júlde taǵy bir ońtústik koreıalyq Dabın Chhvege buıyrdy. Ol Annadan nebári 0,4 upaı qalyp ketti (145,06). Ózge qazaqstandyq mánerlep syrǵanaýshylardyń nátıjesi: Anna Farafonova – 7-oryn (122,51), Bagdana Rahıshova – 9-oryn (111,88), ıAsmın Tekık – 10-oryn (105,70).

Juptyq synda kóptegen maman boljaǵandaı, japonııalyq Kana Mýramoto men Daısýke Takahası jeke-dara top jardy (188,30). Kúmis júlde germanııalyq Djennıfer ıAnse van Rensbýrg pen Bendjamın Steffan dýetine buıyrsa, qolany majarstandyq Marııa Ignateva men Danııl Shemko qanjyǵasyna baılady. Alǵashqy altylyqta óner kórsetken qazaqstandyq Gaýhar Naýryzova men Boısangýr Datıev qos baǵdarlamadan soń 7-satyǵa jaıǵasty (145,12 upaı).

Jalpy, bıylǵy dodada Qazaqstan, Japonııa, Ońtústik Koreıa, Italııa, Frantsııa, Germanııa, Izraıl, Bolgarııa, Majarstan, Ázerbaıjan, Moldova, Armenııa, Grýzııa, Ýkraına men Qyrǵyzstan sportshylary baq synady. Otandastarymyz barlyq baǵdarlamada óner kórsetkenin aıta ketken jón.

Esterińizge sala keteıik, Sochı Olımpıadasynyń qola júldegeri Denıs Tendi eske alýǵa arnalǵan báseke alǵash ret 2019 jyly Almatyda ótken. Byltyr mártebeli týrnırdi Astana qalasy qabyldaǵan. Ol kezde 18 eldiń sportshylary elimizdiń bas qalasynda ózara sheberlik baıqasqan.

Denis Ten Memorial Challenge týrnırin Sportty damytý dırektsııasy men Almaty qalasy ákimdiginiń qoldaýymen Denıs Ten qoǵamdyq qory uıymdastyrdy.

Endi saǵat 20:00-de «Halyq arenada» marapattaý rásiminen keıin týrnır jeńimpazdary men júldegerleriniń qatysýymen Gala-shoý ótedi. Gala-shoýdyń qonaǵy – Elena Radıonova. Keremet qoıylymdardy Qazsport telearnasynan tikeleı efırde kórere alasyzdar.

Foto: kazsports.kz