Denıs Ten isi boıynsha apellıatsııalyq sot qashan ótetini belgili boldy
15:49, 01 Naýryz 2019
ALMATY. QazAqparat - Almaty qalalyq soty Denıs Ten isi boıynsha apellıatsııalyq shaǵymdy qaraý ýaqytyn belgiledi, dep habarlaıdy QazAqparat tilshisi qalalyq sottyń baspasóz qyzmetine silteme jasap.
«Almaty qalalyq sotynyń apellıatsııalyq kollegııasy A.Qudaıbergenov, N.Qııasov, J.Tolybaevaǵa qatysty apellıatsııalyq shaǵymdardy 13 naýryzda 15:00-de qaraıtyn boldy», - dep málim etti baspasóz qyzmetinen.
Aıta ketsek, belgili sportshy, Olımpıada júldegeri Denıs Tendi óltirgen Arman Qudaıbergenov, Nuraly Qııasov jáne Janar Tolybaevalar 17 qańtarda sottalǵan bolatyn. Sýdıa eki sottalýshyny 18 jylǵa bas bostandyǵynan aıyrý týraly, júkti áıel Tolybaevany 4 jylǵa bas bostandyǵynan aıyrý týraly úkim shyǵardy.
Almaty qalalyq sotynyń apellıatsııalyq alqasyna qos taraptan da apellıatsııalyq shaǵym túskenin habarlaǵan bolatynbyz.