Denıs ekeýmiz «S.O.S» ánimen birge óner kórsetýdi armandaǵan edik - Dımash Qudaıbergen

ASTANA. QazAqparat - QR Mádenıet jáne sport mınıstri Arystanbek Muhamedıulymen kezdesý barysynda Dımash Qudaıbergen Astanada Denıs Tenniń kórmesin uıymdastyrǵan jandarǵa alǵysyn bildirdi, dep habarlaıdy QazAqparat tilshisi.

«Denıs Ten - qazaqtyń eshqashan sónbeıtin jaryq juldyzy. Túndeletip Qazaqstanǵa kelip, Denıs Tenniń kórmesin ótkizip jatqan jandarǵa alǵysymdy bildireıin dep, kórmege bardym. Eshkim joq kezde ózimmen ózim kórmede ótken-ketkendi eske aldym. Denısti maqtaýdyń ózi artyq. Sizder ony keremet sportshy, daryn ıesi retinde bilesizder, al men ony dos tuttym. Biz etene aralasyp, sońǵy jyldary jaqyn dos boldyq. Denıstiń kishipeıildigi unaıdy maǵan. Óte qarapaıym edi. Jalpy, bıik belesterdi baǵyndyrǵan adamdar tákapparlyq tanytyp, pendeshilikke boı aldyrady ǵoı. Denıstiń boıynan ondaıdy eshqashan kórmedim», - dedi Dımash Qudaıbergen.

Ánshi Denıspen birge júrgen kezde dostar arasynda «Olımpıada chempıony bizben birge qarapaıym jerde tamaq ishe me?» dep ázildeıtinin eske aldy.

«Keıde túnde dalaǵa shyǵyp, eń arzan bir jerge bara salatynbyz. Onyń árbir aıtqan sózi, jasaǵan eńbegi qazaqtyń, eliniń mártebesi úshin edi. Óıtkeni, ózderińiz oılap qarasańyzdar, ol qazaqtyń tarıhynda bolmaǵan jetistikterge jetti. El atynan osyndaı azamattar bar ekenin dáleldeý úshin, mánerlep syrǵanaýdan qazaqtar da álem chempıony atana alatynyn dáleldeý úshin shetelde bilim aldy. Aldaǵy ýaqytta keıin Qazaqstanda osy júıeni qolǵa alyp, shákirt tárbıelesem dep armandady. Meniń kelesi kontsertimde ekeýmiz Beıjińde nemese basqa elde úlken stadıonda kontsert berip, «S.O.S» ánimen tandemde shyǵamyz dep armaǵandaǵan bolatynbyz. Endi Londonda ol ándi men ózim ǵana oryndaımyn», - dedi Dımash Qudaıbergen.

Eske sala ketsek, 10 qarashada Astanadaǵy «MEGA Silk Way» saýda, oıyn-saýyq ortalyǵynda qazaqstandyq mánerlep syrǵanaýshy Denıs Tenge arnalǵan «D10 WORLD» kórmesi ashylǵan bolatyn.