Deni saý adam fıdııa sadaqasymen orazadan qutyla almaıdy – Bas múftı

NUR-SULTAN. QazAqparat – Deni saý adam fıdııa sadaqasyn berip, orazannyń paryzynan qutyla almaıdy. Bul týraly Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly aıtty, dep habarlaıdy QazAqparat tilshisi.

«Jalpy, dinde fıdııa sadaqa degen bar. Bul rette mynaǵan jaqsylap nazar aýdarýlaryńyzdy suraımyn. Keıde túsinbeı, oraza ustamaǵan adam qarajat berse bola ma dep jatady. Olaı emes, negizi oraza - densaýlyǵy durys, balıǵat jasqa tolǵan árbir adamǵa mindettelgen qulshylyq. Kim balıǵat jasyna tolsa, densaýlyǵy jarasa, ózi orazasyn ustaýy kerek. Fıdııa sadaqasy bir jaǵdaıda ǵana beriledi. ıAǵnı, oraza ustaýǵa densaýlyǵyńyz jaramaı qalsa nemese jasyńyz ulǵaıyp, álsiregen kezde bolsańyz, fıdııa sadaqasyn beresiz. Onda da jaǵdaıyńyz kelse ǵana. Demek deni saý adam fıdııa sadaqasyn berip, orazada qutyldym deýine bolmaıdy», - dedi Naýryzbaı qajy Taǵanuly Ortalyq kommýnıkatsııalar qyzmetindegi brıfıng barysynda.