Dene qyzýy kóterilse, qalaı túsirgen jón - dáriger keńesi

ALMATY. QazAqparat - Óńirlik kommýnıkatsııalar qyzmetinde ótken baspasóz máslıhatynda №16 qalalyq emhananyń jalpy tájirıbe dárigerleri bóliminiń meńgerýshisi Baıan Tákibaeva adamnyń dene qyzýy kóterilgende ne isteý keregin jáne vırýsqa qarsy dári-dármekti qandaı jaǵdaıda qoldaný qajet ekenin túsindirdi, dep habarlaıdy QazAqparat tilshisi.

Dárgerdiń sózinshe, dene qyzýy 38 gradýstan joǵary bolmasa, dári ishý qajet emes.

«Dene temperatýrasyn 38 C deıin kóterilgen jaǵdaıda túsirý usynylmaıdy, sebebi bul organızmniń ınfektsııalyq agressorǵa qorǵanys reaktsııasy. Dene temperatýrasynyń joǵarylaýynan patogendik bakterııalar men vırýstar óledi, biraq árbir organızm jeke. Bireý aıaqta júrip, 37-38 gradýs temperatýraǵa shydaı alady jáne dene qyzýyn tipti baıqamaıdy da ony túsirýge asyqpaıdy, bul aǵzanyń kúresýine múmkindik beredi, al endi bireý qyzý túsiretin dárisiz júre almaıdy. Joǵary temperatýrany óz betinshe túsirýge bolady - muny isteý úshin mańdaıǵa salqyn kompress jasap, ony shamamen 30 mınýt ustap, qyzýdy basatyn dárini qabyldaý kerek. Eń senimdi dárilerdiń biri – paratsetamol, ıbýprofen», – deıdi Baıan Tákibaeva.

Aıtýynsha, eger dene temperatýrasy 38,5 gradýstan joǵary bolsa, onda ony mindetti túrde qyzýdy túsiretin preparattarmen túsirý kerek, óıtkeni ol tyryspa, júrekke kúsh túsý jáne qan aınalymy jetkiliksizdigi, esten taný, mıdyń isinýi syndy asqynýlardy týdyrýy múmkin.

Almatylyq dáriger jiti respıratorlyq vırýstyq ınfektsııadan qalaı qorǵaný kerektigin de aıtty.

«Qoldy jıi jýý, respıratorlyq gıgıena – bul jótelgende jáne túshkirgende aýyz ben muryndy maılyqpen jabý, adam kóp jınalatyn oryndarǵa barýdy shekteý JRVI jáne tumaý juqtyrý qaýpin azaıtýǵa kómektesedi»,- dedi №16 qalalyq emhanasynyń jalpy tájirıbe dárigerleri bóliminiń meńgerýshisi Baıan Tákibaeva.