Demokratııalyq kúshter koalıtsııasy qazaqstandyqtarǵa úndeý jarııalady
Demokratııalyq kúshterdiń jalpyulttyq koalıtsııasynyń kezekti otyrysynda Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııa daıyndaǵan, Parlamenttik tyńdaýda tanystyrylǵan jańa alfavıttiń Biryńǵaı standarttar jobasy talqylandy.
Úndeýde Qazaqstannyń barlyq azamattaryn Elbasynyń qazaq tilin latyn qarpine kóshirý jónindegi bastamasyn talqylaýǵa belsendi qatysýǵa jáne qoldaýǵa shaqyrǵan.
«Qazirgi ýaqytta memleketter men ulttarǵa asa qatal talap qoıylyp otyr. Óz dástúri men qundylyqtaryn, mádenıeti men tilin joǵaltpaı turaqty jańarýǵa, jańǵyrýǵa, básekelik artyqshylyqtaryn kúsheıtýge baǵyttalǵandardyń ǵana derbes bolashaǵy bar.
Latyn álipbıi álemde eń keń taralǵan. Latyn grafıkasy qazirgi zamanǵy tehnologııalyq ortanyń, baǵdarlamalaýdyń jáne ınfokommýnıkatsııalyq tehnologııalardyń barlyq tilderiniń sımvoldyq negizi bolyp tabylady», - delingen úndeýde.
Sondaı-aq, onda qazirgi zamandaǵy álemde ınnovatsııalardyń, ǵylymı jańalyqtar men bilim berý ádebıetiniń basym kópshiligi aǵylshyn tilinde jarııalanatyny aıtylǵan. Aǵylshyn álipbıiniń negizinde latyn qarpine kóshý qazaq tiliniń jańa evolıýtsııalyq kezeńi dep atap kórsetilgen.
«Latynǵa kóshý arqyly biz ultymyzdyń álemdik básekege qabilettiligin arttyratyn úsh máseleni sheshemiz. Birinshiden, aǵylshyn alfavıtiniń negizindegi jańa qarip júıesi jastarymyzdyń da jasamystarymyzdyń da aǵylshyn tilin meńgerýin jeńildetedi ári jedeldetedi. Ekinshiden, aǵylshyn alfavıti men tilin úırený arqyly ǵylym-bilimniń osy tilde jasalǵan mol qazynasyn erkin ıgerýge jol ashady. Úshinshiden, jer júzine tarydaı shashylǵan bar qazaqtyń basyn qosady. Latyn qarpine kóshe otyryp, qazirgi zamanǵy qazaq tili básekege qabilettirek bolady, óz damýy men tanymaldylyǵynda jańa ımpýls alady», - delingen úndeýde.
Memlekettik tildiń jańa álipbıi qazaqstandyqtardyń nyǵaıýy men birliginiń myqty quraly retinde qyzmet etýi tıistigi atalyp ótilgen.
«Latyn qarpine kóshý - bizdiń elimiz úshin qaǵıdaly másele jáne Qazaqstannyń árbir azamatynyń qatysýyn talap etedi.
Biz Qazaqstan Táýelsizdik jyldary ótken biregeı tarıhı joly, jalpyulttyq birlik pen qoǵamdyq kelisim, halyqtyń rýhanı kúshi, onyń ýaqyt talaptaryn qabyldap, tek alǵa júrý qabileti bizdiń memleketimizdiń jetistiginiń aıqyndaýshy faktory bolǵan jáne bolashaqta bolatynyna nyq senemiz», -delingen úndeýde.
Aıta keterligi, Demokratııalyq kúshterdiń «Qazaqstan-2050» jalpyulttyq koalıtsııasy «Nur Otan» partııasynyń bastamasymen quryldy. Ol 5 saıası partııanyń, 17 iri qoǵamdyq birlestiktiń jáne 500-den astam úkimettik emes uıymdardyń basyn biriktiredi.