Demeýdiń júldesi ǵana kóńilimizge demeý boldy – Dáýlet Turlyhanov
Ol jubanysh beldesýinde ırandyq Álı Ámir Azarpıramen beldesip, qarsylasynan 6:1 esebimen utylyp qaldy. Osy beldesýden keıin, qazaqtyń dańqty balýany Dáýlet Turlyhanovpen arnaıy jolyǵyp, shaǵyn suhbat aldyq. Ol Kazinform tilshisine bergen eksklıýzıv suhbatynda balýandardyń Olımpıadadaǵy kórsetkishine kóńili tolmaǵanyn jetkizdi.
- Dáýlet myrza, mine, búgin Parıj Olımpıadasy óz máresine jetip jatyr. Álisher Erǵalıdiń sońǵy kúresin óz kózińizben kórdińiz. Balýandarymyzdyń nátıjesine kóńilińiz toldy ma?
- Mine, qazaq sportshylary úshin kezekti Parıj Olımpıadasy óz máresine jetti. Kúres túrlerinen Parıjge segiz balýan kelgen bolatyn. Ókinishke qaraı, onyń bireýi ǵana úmitti aqtady. Naqtyraq aıtsam, grek-rım kúresinen Demeý Jadyraev baýyrymyz kúmis medal jeńip alǵan bolatyn. Qazir sol Demeýdiń bir ǵana júldesi kóńilge demeý bolyp tur. Biraq, bul jalqy kúmis qazaq balýandarynyń joǵarǵy jetistigi dep aıta almaımyn. Dese de, Tokıo Olımpıadasymen salystyrǵanda birshama joǵary jetistik.
- Jańa ǵana kóz aldyńyzda Álisher Erǵalı synǵa tústi. Bul oǵan sońǵy múmkindik edi. Alaıda, ol sol múmkindikti paıdalana almady. Ne jetpedi dep oılaısyz?
- Iá, bul Álisher inimizge qolaǵa qol jetkizýge berilgen óte úlken múmkindik edi. Shırek fınalda ózderińiz kórdińizder, utylyp qaldy. Baǵyna qaraı, qarsylasy fınalǵa shyǵyp, oǵan jaqsy múmkindik syılady. Ol ony durys paıdasyna jarata almady. Ne bel, ne belbeý ketedi dep kúresýi kerek edi. Oǵan minez jetispedi dep oılaımyn.
- Ózińizdiń ishki esebińiz boıynsha qazaq balýandary qansha medal alady dep josparladyńyz?
- Shynyn aıtý kerek, óz basym qazaq balýandary kemi 2-3 medal alady dep oıladym. Biraq, kúrestiń aty – kúres, Olımpıada oıyndaryna eń myqty degen balýandar ǵana keledi. Sondyqtan, tek myqtylar ǵana jeńip shyǵady. Bizdiń balýandarda jeńiske degen qulshynys oty janbady.
- Qaı balýandardyń kúresine kóńilińiz tolmady?
- Jasyratyny joq, Demeý baýyrymyzda ǵana kózinde ot oınap turdy. Jeńiske degen qulshynysy da basqa balýandarmen salystyrǵanda ózgeshe boldy. Baryn saldy. Aıanyp qalmady. Fınaldyń ózinde kúmiste turǵanyn bile turyp, altyn medal úshin shyn peıilimen, júregimen, jan-tánimen arpalysty. Ol naǵyz sportshyǵa, balýanǵa tán minez kórsetti. Ózge balýandarymyzdyń kúresine kóńilim tolǵan joq. Demeý altyn alsa eken dep armandadym, biraq, ókinishke qaraı kúmis buıyrdy.Olımpıada oıyndarynda kúmistiń ózi kez kelgen sportshyǵa buıyra bermeıdi.
- Al basqa balýandardyń jeńilis tabýyna kimder kináli dep aıtar edińiz?
- Bul jerde negizinen balýandardyń ózderi kináli. Sondaı-aq, bapkerlerden de olqylyqtar ketti dep esepteımin.
- Endi, osy olqylyqtarmen jumys isteý úshin ne isteý kerek dep esepteısiz?
- Eń birinshi sportshylardyń daıyndyq júıesine úlken ózgerister jasaý kerek dep oılaımyn. Barlyq jaǵynan ózgerister kerek. Memleket tarapynan, mınıstrlik tarapynan, federatsııa tarapynan, Ulttyq olımpıadalyq komıteti tarapynan tıisti sharalar qabyldanýy kerek. Olımpıada oıyndaryna deıin balýandarymyz oqý-jattyǵý jıyndaryn óte joǵary deńgeıde ótkizdi. Memleket tarapynan barlyq tıisti qarajat ýaqytyly bólindi. Biraq, keıbir balýandarymyz Parıjde jaqsy óner kórsete alǵan joq. Endi, múmkin, balýandarymyzdyń psıhologııalyq jaǵyn, múmkin jas shamasy jaǵyn qarastyrýymyz kerek shyǵar. Qazirgi balýandarymyzdyń jas shamasy da birazǵa kelip qalǵan. Jalpy, kúres túrlerinen kelesi Olımpıadaǵa irikteýdi múlde ózgeshe qabyldaý kerek.
- Bıyl, alǵash ret áıelder kúresinen balýandarymyz Olımpıadadan tys qaldy. Bul týraly ne aıtasyz?
- Iá, bıyl balýan qyzdarymyzdyń Olımpıadaǵa joly bolmady. Іrikteý syndarynda lıtsenzııaǵa qol jetkize almady. Endi, bul týraly áńgimelerdiń barlyǵy Olımpıada oıyndarynan keıin bir sheshimin tabady dep esepteımin.
- Áńgimeńizge raqmet!