Demeý Jadyraev Jetisý oblysynyń Qurmetti azamaty» atanyp, baspanaly boldy

<p>TALDYQORǴAN. KAZINFORM - Búgin Jetisý oblysynyń ákimi Beıbit Isabaev Parıjde ótip jatqan HHHІІІ &nbsp;Olımpıadanyń kúmis júldegeri, palýan Demeý Jadyraevty qabyldap, &laquo;Jetisý oblysynyń Qurmetti azamaty&raquo; tósbelgisin taqty. Anasy Kúlıpa Bıjanovaǵa saltanatty túrde qurmet kórsetip, Jarkent qalasynan jańa úıdiń kiltin tabystady. Bul týraly oblys ákimdiginiń baspasóz qyzmeti málimdedi.</p>

«Alyp anadan týady», halqyna laıyqty perzent bola bilgen osyndaı er azamatty tárbıelep ósirgenińiz úshin eń aldymen Demeýdiń anasy, Sizge alǵysymyzdy bildiremiz. Qurmettiń úlkeni, syıdyń tóresi eń aldymen anaǵa jasalýy kerek», - dedi Beıbit Isabaev.

Oblys basshysy QR eńbek sińirgen jattyqtyrýshylary – sportshynyń alǵashqy bapkeri Jumahan Turǵambekov jáne jeke bapkeri Boranbek Qońyratovqa da rızashylyǵyn bildirip, qarjylaı syılyqtar tapsyrdy. 

Foto: Jetisý oblysy ákimdigi

Jetisý jurtshylyǵy jerlesteriniń Olımpıadadaǵy boz kilemge shyqqan ár qadamyn qalt jibermeı qarap, tilektes bolyp otyrǵanyn aıta kele Beıbit Isabaev: «Buǵan deıin de Azııa, Álem chempıonattarynda júldeli oryndar alyp júrgenińdi bilemiz. Degenmen Olımp shyńyn baǵyndyrý – kez kelgen sportshynyń basty armany. Sol armanyńa seni ózińniń qajyr-qaıratyń, tabandylyǵyń, jattyqtyrýshylaryńnyń eńbegi, týǵan eldiń tilektestigi, eń bastysy abzal anańnyń aq batasy jetkizdi», - dedi.

Demeý Jadyraev aldymen anasyna erekshe qurmet kórsetkeni úshin alǵys bildirdi. 

Foto: Jetisý oblysy ákimdigi

«Anamdy arnaıy shaqyryp, qurmettep, baspana syılap jatqandaryńyzǵa kóp rahmet aıtamyn. Kezinde Taldyqorǵanda Jaqsylyq Úshkempirov atyndaǵy daryndy balalarǵa arnalǵan sport-ınternat mektebinde tórt jyl oqyp, sol jerde qanatymyz qataıdy, úlken sportqa qadam basýǵa kópir boldy. Týyp-ósken jerimiz «Jetisý oblysynyń Qurmetti azamaty» ataný men úshin úlken mártebe», - dedi Demeý Jadyraev.

Eske salsaq, grek-rım kúresinen Qazaqstannyń eńbek sińirgen sport sheberi Demeý Jadyraev – Jetisý oblysy Panfılov aýdany Úsharal aýylynyń týmasy.

Onyń sporttaǵy alǵashqy qadamy Úsharal aýylyndaǵy mektepte kúres sektsııasyna qatysýdan bastalǵan. Bul sektsııada oǵan kúrestiń bastapqy álippesin úıretken jattyqtyrýshy Jumahan Turǵambekov boldy.

Keıin 2003-2007 jyldarda Demeý Jadyraev Taldyqorǵan qalasyndaǵy daryndy balalarǵa arnalǵan sport-ınternat mektebinde oqydy. Bul mektepten Mırat Sársenbaev, Karına Gorıcheva, Igor Son, Ilfat Abdýllın sııaqty álem chempıondary men Olımpıada júldegerleri shyqqan.

Osylaısha Jetisý jerinen bastalǵan sporttaǵy jol úlken dańǵylǵa ulasyp, Demeý Jadyraev bıyl Parıjde ótip jatqan HHHІІІ jazǵy Olımpıada oıyndarynda kúmis medalǵa ıe boldy.

Aıta keteıik, qazaqstandyq sportshy 7 tamyz kúni Parıj Olımpıadasynyń kúmis júldegeri atandy. 

Sondaı-aq Demeý Jadyraev búgin elge oraldy.