Demalysqa keter bolsańyz qaryzyńyzdy esten shyǵarmańyz - salyq organdary eskertedi

ASTANA. QazAqparat - Astana qalalyq memlekettik kirister departamenti jazǵy demalys qarsańynda salyq bereshekterin óteý qajettigin eske salady. Mundaı eskertý Qazaqstannan tysqary aýmaqqa shyǵar aldynda keleńsizdikterdiń oryn almaýy úshin jasalyp otyr, dep habarlaıdy QazAqparat tilshisi.

Qazaqstan zańnamasynda bereshegi bar Qazaqstan azamattarynyń shetelge shyǵýyna shekteý qoıý nemese múlkin buǵattaý quqyǵy sot oryndaýshylaryna berilgen. Salyq bereshektiń joq ekendigi (bar ekendigi) týraly aqparatty QR Qarjy mınıstrligi Memlekettik kirister komıtetiniń resmı ınternet-resýrsynan nemese Egov.kz elektrondy úkimet portalynan qaraýǵa bolady.

Buǵan qosa, Nursultan Nazarbaev halyqaralyq áýejaıynda azamattarǵa qolaıly bolý úshin arnaıy termınaldar ornatylǵan. Odan JSN arqyly bereshektiń bar-joǵy týraly aqparattardy bilip, bar bolǵan jaǵdaıda tóleýge de múmkindik jasalǵan.

«Buǵan qosa árbir qazaqstandyq Qazaqstan Respýblıkasynyń aýmaǵynan tysqary shyǵýǵa ýaqytsha shekteý qoıylǵan boryshkerlerdiń tiziminen ózin Qazaqstan Respýblıkasy Ádilet mınıstrliginiń resmı ınternet-resýrsynan da teksere alatyndyǵyn qosymsha habarlaımyz», - dep atap ótedi departamentten.