Demalys jáne mereke kúnderi el aýmaǵynda 31 tabıǵı órt boldy

NUR-SULTAN. QazAqparat - 3-6 shilde aralyǵynda el aýmaǵynda 31 tabıǵı órt tirkeldi. Onyń ishinde 18 orman, 13 dala órti bar. 25 órt TJM, orman sharýashylyǵy, Qazavıaormanqorǵaý, jergilikti atqarýshy organdar men órtke qarsy erikti qurylymdardyń, sharýa qojalyqtarynyń kúshimen sóndirildi, dep habarlaıdy QazAqparat.

Órt aýdany - 5 642 ga. Órtter Aqmola, Almaty, Aqtóbe, Shyǵys Qazaqstan, Batys Qazaqstan, Qaraǵandy, Qostanaı, Soltústik Qazaqstan oblystarynda tirkeldi.

Aqmola jáne Qaraǵandy oblystaryndaǵy órt saldarynan 2 adam qaıtys boldy. Qaraǵandy oblysynda 210 bas iri jáne usaq mal qyryldy.

Sonymen qatar, dala alqaptary janǵan 56 oqıǵa tirkeldi, onyń aýmaǵy - 18 446 ga.

Qazirgi ýaqytta TJM baqylaýynda 6 tabıǵı órt jáne 5 órt tur. Eldi mekenderge qaýip joq.

Aqmola oblysynyń Býrabaı aýdanynda 2 oqıǵa («Býrabaı» MUTP aýmaǵynda, Mırnoe jáne Urymqaı ormanshylyǵynda) boldy.

Órt kólemi anyqtalýda, órt sóndirý jumysy jalǵasyp jatyr. Órt sóndirýge TJ departamentinen (6 qyzmetker jáne 1 tehnıka), orman sharýashylyǵynan (12 qyzmetker jáne 3 tehnıka) 18 adam jáne 4 tehnıka jumyldyryldy.

Shyǵys Qazaqstan oblysynyń Ulan aýdany Asýbulaq KShSh aýmaǵynda 1 oqıǵa oryn aldy. Órttiń aldyn ala kólemi 2,6 ga quraıdy, órt sóndirý jumysy jalǵasýda.

Qaraǵandy oblysynyń Ulytaý aýdanynda 3 oqıǵa oryn aldy (Jangeldi jáne Aqtasty aýyldyq okrýgteriniń aýmaǵynda aldyn ala alańy 4000 ga, Sheńber aýyldyq okrýginiń aýmaǵyndaǵy eki ýchaskede, aldyn ala kólemi 950 jáne 550 ga), órt sóndirý jalǵasyp jatyr.

Órtti sóndirýge TJ departamentinen (119 qyzmetker jáne 21 tehnıka), TJM 52589 áskerı bóliminen (154 á/b jáne 8 tehnıka), JAO, erikti órtke qarsy qurylymdardan (249 qyzmetker jáne 39 tehnıka) 522 adam men 68 tehnıka jumyldyryldy.

Aýmaqty áýeden barlaý úshin QR TJM «Qazavıaqutqarý» AQ MI-8 tikushaǵy jumyldyryldy.

Qostanaı oblysynda jalpy 5 órt boldy. Bireýi - Jangeldi aýdanynda («Altyn dala» tabıǵı rezervatynyń aýmaǵynda, 5 shilde saǵat 15.20-da oqshaýlandy, aýdany - 190 ga), taǵy bireýi - Amangeldi aýdanynda (6 shilde saǵat 01.45-te oqshaýlandy, aýdany - 430 ga), ekeýi - Naýryzym aýdanynda (memlekettik tabıǵı qoryq aýmaǵynda, aldyn ala aýmaǵy - 600 ga, Sholaqsaı aýylynan 6 shaqyrym jerde 7 shilde saǵat 08.30-da, aýdany - 500 ga), bireýi - Qarabalyq aýdanynda (Mıhaılovka OShB aýmaǵynda 6 shilde saǵat 20.55-te, aýdany - 150 ga), órt sóndirý jumysy jalǵasyp jatyr.

TJM tabıǵı órt qaýpin azaıtý maqsatynda órt qaýipsizdigi talaptaryn saqtaýǵa shaqyrady:

- janyp turǵan sirińke men temeki tuqylyn tastamańyzdar;

- orman jáne dala alqaptarynda ot jaqpańyzdar;

- shyny ydysty ózińizben birge alyp júrý kerek, óıtkeni kún sáýlesi áınekten ótip, qurǵaq shópti fokýstap, órtep jiberýi múmkin;

- janǵysh qoqysty shyǵarý jáne eldi meken aýmaǵyn jınaý, qurǵaq ósimdikterden tazartý jáne mıneraldandyrylǵan jolaqtardy qalpyna keltirý sharalaryn júrgizińizder;

- tabıǵı órt týyndaǵan jaǵdaıda dereý órtke qarsy qyzmetke 101, 112 telefondaryna habarlasyńyzdar.