Demalys kúnderi eki oblys elordaǵa 980 tonna ónim ákeledi

NUR-SULTAN. QazAqparat - Elordada Qostanaı jáne Qaraǵandy oblystary sharýalarynyń jármeńkesi 3-4 qazanda ótedi, dep habarlaıdy QazAqparat tilshisi ákimdikke silteme jasap.

3-4 qazan kúnderi «Han Shatyr» SOO janyndaǵy alańda (Qonaev kóshesi men Turan dańǵylynyń qıylysy) Qostanaı jáne Qaraǵandy oblystarynyń qatysýymen jármeńke ótedi.

Eki kún ishinde 14 aýdan men 7 qaladan 130-dan astam kásiporyn aýyl sharýashylyǵy ónimderin satatyn bolady.

Jármeńkede sút, et ónimderin shyǵaratyn respýblıkaǵa jáne shet elge tanymal kásiporyn brendteri óz ónimderin usynady.

Kásiporyndar 980 tonna kóleminde 100-den astam ónim túrin satýdy josparlap otyr. Onyń ishinde túrli mal eti – 150 tonnadan astam, sút ónimderi – 50 tonna; shujyq ónimderi jáne jartylaı et ónimderi – 20 tonna, balyq – 5 tonna; jarma jáne makaron ónimderi – 30 tonna; kartop pen kókónis – 60 tonna; un – 50 tonna.

Sondaı-aq, usynylǵan ónimderdiń assortımentine nan-toqash, kondıterlik ónimder, bal jáne t. b. kiredi.

Barlyq ónim ortasha naryqtyq baǵadan 10-15% tómen satylatyn bolady.

Kelýshiler sanıtarlyq-epıdemıologııalyq normalar men qashyqtyqty saqtaýdy, maska taǵýdy jáne sanıtaızerlerdi qoldanýdy umytpaýy kerek.