Demalys ornynan qońyz shyqqan: Reseıge demalýǵa barǵan oqýshylar keri qaıtty
Atyraý oblystyq bilim berý basqarmasynyń basshysy Marat Ábýovtiń aıtýynsha, «Qazaqstan geologi» emdeý pansıonaty 2001 jyldan beri jumys isteıdi. Reseı Federatsııasynyń Stavropol ólkesinde Jeleznovodsk qalasynyń mańyndaǵy Inozemtsevo kentinde ornalasqan. Pansıonat ornalasqan Beshtaý taýynyń etegindegi jer Qazaqstannyń Respýblıkasynyń menshiginde berilgen.
«Pansıonat ekologııalyq taza, kýrortty aımaqta ornalasqan. Onyń barlyq jaǵy ormanmen qorshalǵan. Mıneraldy bulaq kózi, bıývet bar. Mekeme 12 aı boıy kelýshilerdi qabyldaıdy. Jylyoı aýdanyndaǵy sý tasqynynan zardap shekken otbasylardaǵy balalardy kanıkýl kezinde atalǵan demalys ornyna jibergen edik. Aýdandyq bilim bólimi balalar tizimin jasaqtap, 26 qazanda 174 oqýshyny, onyń ishinde 113 ul men 61 qyzdy 18 jetekshi muǵalim bastap bardy. Olar pansıonatqa keshe, 27 qazanda Qazaqstan ýaqytymen keshki saǵat 22:00 shamasynda jetti. Oqýshylar pansıonatta 4 qarashaǵa deıin demalatyny josparlanǵan edi», -dedi Marat Ábýov.
Onyń deregine súıensek, pansıonat ornalasqan eldi mekende birneshe kún jańbyr jaýǵan. Sodan soń aýa raıy kúrt jylyp, aǵash qońyzy kóbeıgen.
«Bul pansıonatta birneshe korpýs bar. Qyzdar jatatyn №6 korpýstyń 1-2 bólmesiniń ashyq qalǵan terezesinen qońyzdyń kirgeni anyqtalyp otyr. Ózge korpýstardaǵy bólmelerge qońyz kirmegen. Dárigerlerdiń aıtýynsha, aǵash qońyzdary adamǵa zııan keltirmeıdi. Soǵan qaramastan 21-26 qazan aralyǵynda pansıonattyń korpýstaryna 2 márte dezınfektsııalaý júrgizilgen. Tabıǵattyń qubylysynan keıin qońyzdyń taralýyna baılanysty Jylyoı aýdanynan demalýǵa barǵan oqýshylardy elge qaıtarýǵa sheshim qabyldandy. Oqýshylar búgin, 28 qazanda Qazaqstan ýaqytymen saǵat 15:00-de 4 avtobýspen Atyraýǵa qaraı jolǵa shyǵady», -dep málim etti Marat Ábýov.
Eske sala ketelik, budan buryn tasqyn sý basqan Qulsarynyń turǵyndaryna 62 úı berilgenin habarlaǵan edik.