«Delta Bank» aktsıonerlik qoǵamyn taratý protsesi bastaldy

ASTANA. KAZINFORM - QR Ulttyq banki «Delta Bank» AQ bank operatsııalaryn júrgizýge, qundy qaǵazdar naryǵynda jumys jasaýǵa lıtsenzııasyn toqtatý týraly sheshim shyǵardy, dep habarlaıdy QazAqparat tilshisi.

QR Ulttyq bankiniń 2017 jylǵy 2 qarashadaǵy №194 qaýlysyna sáıkes 3 qarashadan bastap «Delta Bank» AQ bank operatsııalaryn júrgizýge, qundy qaǵazdar naryǵynda jumys jasaýǵa lıtsenzııasyn toqtatty. 

Bul sheshimge kelisimde kórsetilgen tólem jáne aýdarym mindettemelerin ýaqytynda oryndamaý (1 jylda 2-3 ret), prýdentsıaldy normatıvti 1 jylda birneshe ret buzý deregi negiz bolyp otyr.

QR Ulttyq banki tóraǵasynyń 2 qarashadaǵy №402 buıryǵymen ýaqytsha ákimshilik quryldy.

Ýaqytsha basshylyq taratý komıssııasy qurylǵanǵa deıin jumys isteıtin bolady.

3 qarashadan bastap klıentterdiń bank shoty boıynsha barlyq operatsııalar toqtatyldy.

Óz kezeginde QR Ulttyq banki zań aıasynda bank jumysyn májbúrli toqtatý týraly sotqa aryz túsirdi.

Іs qozǵalǵan kúnnen bastap kredıtorlar talaptaryn taratý óndirisi aıasynda ǵana qoıa alady.

«Delta Bank» AQ jeke tulǵalardyń depozıtin kepildendirý júıesiniń qatysýshysy bolǵandyqtan salymshylar aqshasyn ala alady.

Depozıtter, tólem kartasyndaǵy qarjylar, bank shottaryndaǵy aqshalar «Qazaqstan depozıtterdi kepildendirý qory» AQ qorǵalǵan.

Qor 10 mln teńge, sheteldik valıýtadaǵy salymdar 5 mln teńgeden aspaǵan jaǵdaıda depozıtterdi óteıdi.