«Delta Bank» AQ 2 myńnan astam salymshysy depozıtteriniń ótemin alady

ALMATY. QazAqparat - «Delta Bank» AQ jalpy kólemi 126,4 mln teńge bolatyn 2242 jeke tulǵanyń depozıti saqtalǵan, dep habarlaıdy QazAqparat tilshisi Qazaqstan depozıtterdi kepildik berý  qorynyń (QDKBQ) baspasóz qyzmetine silteme jasap.

QDKBQ bank klıentteri 120,1 mln teńge óteýi tıis. Qordyń kepildi óteý kólemi 547,5 mlrd teńge bolyp tur.

«Qoldanystaǵy zańnamaǵa sáıkes qor bankti májbúrlep taratý týraly sot sheshimi zańdy kúshine engennen bastap 14 jumys kúni ishinde jumys istep turǵan qazaqstandyq bankter ishinen agent-bankti tańdap jarııalaıdy jáne atalǵan agent-bank "Delta Bank" AQ salymshylaryna ótem tóleýdi jáne esep aıyrysýdy bastaıdy.

Zańnamaǵa sáıkes, bul bank qarjylyq jaǵdaıy turaqty, aýqymdy fılıaldyq jelisi bolýy shart.

Bul bank "Delta Bank" AQ salymshylarymen QDKBQ atynan jáne esebinen jumys isteıtin bolady.

Qujattardy qaraý men kepildik berilgen ótemdi tóleýdiń jalpy ýaqyty agent-bank úshin 5 jumys kúninen aspaýy kerek», - dedi qor ókilderi.

QDKBQ lıtsenzııadan aırylǵan bank aqsha aýdarymdaryn jasaý quqyǵynan aıyrylady.

Depozıtter, tólem kartasyndaǵy qarjylar, bank shottaryndaǵy aqshalar «Qazaqstan depozıtterdi kepildendirý qory» AQ men qorǵalǵan. Qor 10 mln teńge, sheteldik valıýtadaǵy salymdar 5 mln teńgeden aspaǵan jaǵdaıda depozıtterdi óteıdi.  

Eskerer másele, tek bank shotyndaǵy qaldyq aqsha ǵana tólenedi. Olarǵa taǵaıyndalǵan paıyzdyq ósim qaıtarylmaıdy.

Aıta ketý kerek, QR Ulttyq banki «Delta Bank» AQ bank operatsııalaryn júrgizýge, qundy qaǵazdar naryǵynda jumys jasaýǵa lıtsenzııasyn toqtatý týraly sheshim shyǵarǵan bolatyn.

QR Ulttyq banki tóraǵasynyń  2 qarashadaǵy  №402 buıryǵymen ýaqytsha ákimshilik quryldy. Ýaqytsha basshylyq taratý komıssııasy qurylǵanǵa deıin jumys isteıtin bolady.

3 qarashadan bastap klıentterdiń bank shoty boıynsha barlyq operatsııalar toqtatyldy.