Delıde eki myńnan astam adam Naýryz merekesin toılady
Merekelik sharany Úndistandaǵy elshilikter uıymdastyrdy, onyń qatarynda Qazaqstan elshiligi de bar. Ony ánshiler, bıi jáne saz ansamblderi óner kórsetetin dástúrli jármeńke retinde ótkizdi, sondaı-aq uıymdastyrýshy elderdiń ulttyq taǵamdary qoıylǵan dastarhandar jaıyldy.
Úndistanda Naýryz úshinshi márte keńinen atalyp ótýde. Bıylǵy kóktem merekesin atap ótýge kelgen qala turǵyndary men qonaqtarynyń sany burynǵydan kóp boldy. Kelýshilerdiń deni Naýryz úndi halqyna etene tanys ári jaqyn bolyp bara jatqanyn atap ótti.
Mádenı baǵdarlama aıasynda Qazaqstan Global Air týrıstik kompanııasy qoldaýymen elshilik kelýin uıymdastyrǵan mýzykalyq-bı ansambli óner kórsetti.
Delı turǵyndary qazaq halqynyń sazy, áni jáne bılerin jaqsy qabyldady. Kómeı sazyn oryndap, shańqobyzda oınaǵan Anar Qasymova, qobyz shertken Darıǵa Qadyrova, sondaı-aq halyq bıin bılegen almatylyq A'DIVA bı ujymynyń óneri kópshiliktiń kóńilinen shyqty.
Qonaqtar qazaqstandyq dıplomattardyń ázirlegen ulttyq as máziri naýryz kóje, qýyrdaq, baýyrsaq, irimshik, jent, qurttan aýyz tıdi, qazaq sheberleriniń qolynan shyqqan kádesyı, kartına jáne ulttyq kıimderdi tamashalady.