Delı-Almaty reısinde tyrysqaqqa kúdikti jolaýshy anyqtaldy

<p>ASTANA. KAZINFORM &mdash; Delı-Almaty baǵyty boıynsha Air Astana reısiniń bortynda sanıtarlyq-karantındik baqylaýdy júzege asyrý barysynda ish ótý, aıqyn álsizdik, aýyzdyń qurǵaýy týraly shaǵymdary bar jolaýshy anyqtaldy.</p>

Densaýlyq saqtaý mınıstrliginiń dereginshe, Qyrǵyz Respýblıkasynyń azamaty Delıden Qyrǵyzstanǵa Almaty qalasy arqyly barmaq bolǵan.

Sanıtarlyq-karantındik baqylaý mamandary juqpaly aýrýǵa kúdikti áıeldi medıtsınalyq tekserýdi jedel uıymdastyryp, taldaý nátıjelerin alǵannan keıin «tyrysqaq» dıagnozy qoıyldy.

Jaqyn baılanysta bolǵan jolaýshylar anyqtaldy, zerthanalyq tekserý taǵaıyndaldy. Naýqas jáne baılanysta bolǵan jolaýshylar Almaty qalasynyń ınfektsııalyq statsıonaryna jatqyzyldy.

Áýe kemesiniń bortynda dezınfektsııa júrgizildi.

Borttaǵy jolaýshylar arasynda aýrýdyń belgileri jáne tyrysqaq aýrýynyń aldyn alý sharalary týraly aqparattyq túsindirme júrgizilip, sımptomdar paıda bolǵan kezde dereý medıtsınalyq kómekke júginý usynyldy.

«Epıdemıologııalyq qyzmetter tarapynan ınfektsııa oshaǵyn ýaqtyly anyqtaý jáne oqshaýlaý tyrysqaqtyń el ishinde taralýyna jol bermeýge múmkindik berdi. Naýqas aýrýhanaǵa jatqyzyldy jáne klınıkalyq hattamaǵa sáıkes barlyq qajetti medıtsınalyq kómekti alady», - dedi vedomstvodan.

Tyrysqaq aýrýy boıynsha qolaısyz elderge (Afrıka, Azııa, onyń ishinde Úndistan, Aýǵanstan, Pákistan elderi) baratyn azamattarǵa usynystar:

* qaınatylǵan nemese bótelkedegi sýdy ishińiz;

* ár túrli sýsyndardy salqyndatý úshin muzdy paıdalanýdan aýlaq bolyńyz;

* tutynar aldynda ónimderdi sáıkesinshe termııalyq óńdeńiz;

* jemister men kókónisterdi qaınatylǵan nemese bótelkedegi sýmen muqııat jýyńyz;

* ár tamaq aldynda jáne dárethanaǵa barǵannan keıin qolyńyzdy sabyndap muqııat jýyńyz;

* tek ruqsat etilgen sý aıdyndarynda shomylyp, onyń ózinde aýyz qýysyna sýdyń kirýine jol bermeńiz;

* aýrýdyń alǵashqy belgileri paıda bolǵan kezde ózin-ózi emdeýge bolmaıdy, dereý medıtsınalyq kómekke júginý kerek.

Foto: QR DSM baspasóz qyzmeti

Foto: QR DSM baspasóz qyzmeti