Delta shtamy naýqastyń dene múshelerin birden zaqymdaıdy - dáriger

ALMATY. QazAqparat - Almatydaǵy ftızıopýlmonologııa ortalyǵynyń dırektory Janar Sápıeva óńirlik kommýnıkatsııalar qyzmetiniń brıfıngte ortalyqtaǵy kovıdtik statsıonardyń jumysy jáne delta shtamynyń jańa klınıkalyq kórinisteri týraly aıtty, dep habarlaıdy QazAqparat.

J. Sápıevanyń aıtýynsha, ftızıopýlmonologııalyq ortalyqty qala ákimdigi belgilegen jáne 2020 jyly koronavırýs ınfektsııasymen syrqattanǵan patsıentterge statsıonarlyq kómek kórsetýge daıyndalǵan.

Ortalyqta barlyq qajetti medıtsınalyq jabdyqtar bar, statsıonarlyq kómek kórsetý úshin 280 tósek-oryn bar.

Ortalyq sonymen qatar «Halyq Arena» sport kesheniniń «úshinshi eshelony» retinde jumys isteıdi.

Ol qaıta beıimdelip, derttiń shyrqaý shegi men epıdemıologııalyq ahýal órshigen kezde rezervtik aýrýhana retinde paıdalanylady.

«Ftızıopýlmonologııa ortalyǵy qazirgi kezde úsh nysanda jumys jasaýda jáne bizge «birinshi eshelon» retinde kún saıyn kóptegen patsıentter túsýde. Sońǵy 2 apta ishinde patsıentter kóp tústi jáne olardyń jaǵdaıy aýyr boldy», - dedi ortalyq dırektory.

Dáriger delta shtamynyń taralýy barysynda derttiń klınıkalyq kórinisiniń ózgergenin basa aıtty.

Birinshiden, aýrýhanaǵa túsetin patsıentter sany kúrt ósti. Bul shtamm denede tez kóbeıedi, tez taralady jáne ınkýbatsııalyq kezeńi qysqa bolady. Qazir 7-8 kún.

Ekinshiden, túsken patsıentterdiń ókpesi qatty zaqymdanǵan.

«Eger biz buryn ókpesi 20-30 paıyz zaqymdanǵan ortasha aýyrlyqtaǵy naýqastardy qbyldasaq, qazir adamdar 30 paıyzdan astam zaqymdanýmen túsýde», - dedi J. Sápıeva.

Dárigerdiń aıtýynsha, alǵashqy kúnderi bul aýrý sýyq tııýge uqsaıdy jáne kóptegen adamdar bul belgilerdi elemeıdi.

Olar - dene qyzýynyń tómendeýi, qaltyraý, shamaly jótel, álsizdik jáne bas aýrýlary.

Sodan keıin 2-3 kúnnen keıin klınıka shapshańdaıdy.

Sondyqtan Janar Sápıeva patsıentterge olardyń jaǵdaıyn muqııat baqylaýǵa jáne eger temperatýra kóterilse, emhanaǵa barýǵa, múmkin, kókirik qýysyn tekserýden ótkizýge keńes beredi.

«Ókpeniń 30% zaqymdanýymen keletin patsıentterde birneshe kún ishinde ókpeniń 60% zaqymdalady. Sonymen qatar, aýrýdyń klınıkalyq kórinisine qusý, júrek aınýy, dıareıa, býyn aýrýy, bulshyqet aýrýy jáne joǵary qyzba sııaqty kórinister qosyldy. Bizdiń patsıentterdiń shamamen 70 paıyzynyń temperatýrasy joǵary. Olardyń árqaısysymen jeke jumys isteýimiz kerek», - dedi dáriger.

Sonymen qatar, Janar Sápıevanyń aıtýynsha, delta shtamynyń taǵy bir óte qaýipti kórinisi - qandaǵy trombotsıtter sanynyń artýy. Bul trombozdan ólý yqtımaldyǵyn arttyrady.

«Nevrologııalyq sımptomdar da qosylady – bas aýrýy, depressııa, keıbir egde jastaǵy naýqastarda mıdaǵy qan aınalymy buzylady», - dedi dáriger.