Deklaratsııada quny 3,5 mln teńgeden asatyn ekzotıkalyq jáne asyl tuqymdy janýarlardy kórsetýge bolady

<p>Aktıvter men mindettemeler týraly jalpyǵa birdeı deklaratsııada azamattar quny 3,5&nbsp;mln teńgeden asatyn asyl tuqymdy janýarlardy kórsete alady. Bul týraly Memlekettik kirister komıteti óndiristik emes tólemderdi, jeke tulǵalardy jáne arnaýly salyq rejımderin ákimshilendirý departamentiniń dırektory Nurjan Qýandyqov aıtyp berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Jalpyǵa birdeı deklaratsııa júıesi barlyq azamattardyń jeke tulǵanyń búkil sheteldik aktıvterin, jyljymaly jáne jyljymaıtyn múlkin kórsetetin «kiris» deklaratsııasyn tapsyrýyna baılanysty.

Onda baǵaly qaǵazdar, tsıfrlyq aktıvter (bıtkoınder), úlestik qatysý sharty (turǵyn úıdegi úles), ınvestıtsııalyq altyn, zııatkerlik menshik jáne avtorlyq quqyq obektileri, 34,5 mln teńge (10 000 AEK) sheginde qolma-qol aqsha jáne notarıaldy kýálandyrylǵan basqa tulǵalarmen nesıe sharttary, sheteldik kompanııaǵa qatysý úlesi, sheteldegi jyljymaıtyn múlik jáne kólik, shetel bankindegi 7,3 myń AQSh dollarynan (1000 AEK) joǵary aqsha kórsetiledi.

«Sondaı-aq, aktıvter men mindetteme týraly deklaratsııada azamattar quny 3,5 mln teńgeden (1 AEK) asatyn janýarlar men qustardyń asyl tuqymdaryn óz qalaýy boıynsha deklaratsııalaı alady. Ósirý nemese paıdalaný úshin janýarlar men qustardy deklaratsııalaýdyń qajeti joq. Aýyl sharýashylyǵy jáne úı janýarlary týraly málimetti memlekettik kiris organdary ýákiletti organdardan alady», — dedi N. Qýandyqov Qarjy mınıstrliginde ótken baspasóz máslıhatynda.

Deklaratsııany turǵylyqty mekenjaı boıynsha «Salyq tóleýshiniń kabıneti», «Elektrondy úkimet» veb-portaldary, «e-salyqAzamat», Halyk, Bank Tsentrkredıt mobıldi qosymshalary arqyly 2024 jyldyń 15 qyrkúıegine deıin tapsyrý qajet.

Deklaratsııany birinshi ret usynbaǵany úshin eskertý, bir jyl ishinde qaıtalap buzǵany úshin 51 750 teńge (15 AEK) kóleminde aıyppul salynady.

Deklaratsııada tolyq emes nemese anyq emes málimetterdi birinshi ret usynǵany úshin — eskertý, bir jyl ishinde qaıtalap buzǵany úshin — 10 350 teńge (3 AEK) kóleminde aıyppul salynady.

Jyl ishinde birinshi ret salyq obektilerin jasyrǵany úshin — tólenbegen salyq somasynyń 200% mólsherinde aıyppul, qaıtalap buzýshylyq úshin — 300% aıyppul salynady.

Aıta keteıik, 2021 jyldyń 1 qańtarynan bastap Qazaqstanda kezeń-kezeńimen jalpyǵa birdeı deklaratsııa engizilip keledi.

Bıyl ekinshi kezeńde kvazımemlekettik sektordyń memlekettik mekemeleriniń qyzmetkerleri jáne olardyń jubaılary — shamamen 2,1 mln adam deklaratsııa tapsyrady.

Úshinshi kezeńde — 2024 jylǵy 1 qańtardan bastap deklaratsııany zańdy tulǵalardyń quryltaıshylary (qatysýshylary), jeke kásipkerlik basshylary, sondaı-aq olardyń jubaılary tapsyrady (3,9 mln adam).

2025 jyly 13 mıllıonnan astam adamdy qamtý josparlanyp otyr.