DEF reıtınginde Qazaqstan qandaı elderdi basyp ozdy

ASTANA. QazAqparat - Dúnıejúzilik ekonomıkalyq forýmnyń Jahandyq básekelestik reıtınginde Qazaqstan 61,8 bal jınap, Kolýmbııa, Túrkııa, Brýneı, Perý elderiniń aldyna shyqqan. Bul týraly Úkimette ótken baspasóz máslıhatynda Ulttyq ekonomıka mınıstri Tımýr Súleımenov málim etti, dep habarlaıdy QazAqparat tilshisi.

«Ekinshi jyl qatarynan, alǵashqy tórttiktegi elder sol qalpy qaldy. Olar: AQSh, Sıngapýr, Germanııa jáne Shveıtsarııa», - deıdi mınıstr.

Tımýr Súleımenov habardar etkendeı, TMD elderiniń arasynda Reseı kóshbasshy (43 oryn, +2). Odan keıingi oryndarda Qazaqstan (59 oryn, ózgerissiz), Grýzııa (66 oryn, +1), Ázerbaıjan (69-oryn, -4), Armenııa (70 oryn, +2), Ýkraına (83 oryn, +6), Qyrǵyz Respýblıkasy (97 oryn, +3) jáne Tájikstan (103 oryn, -5) ornalasqan.

«Qazaqstan 2017 jylmen salystyrǵandaǵy óz jaıǵasymyn 0,7 balǵa jaqsarta otyryp, 61,8 ball jınaqtady. Bul oǵan Kolýmbııa (60), Túrkııa (61), Brýneı (62) jáne Perý (63) tárizdi elderdi basyp ozýǵa múmkindik berdi», - deıdi ol.

Tutas alǵanda, Dúnıejúzilik ekonomıkalyq forým Qazaqstandy «Eńbek naryǵy» - 30 oryn jáne «Bıznestiń qarqyndylyǵy» - 37 oryn sekildi faktorlar boıynsha básekelestik artyqshylyqqa ıe dep belgilegen. Al «Naryq kólemi» (45), «Bilim jáne daǵdylar» (57), «Taýarlar naryǵy» (57), «Instıtýttar» (61), «Makroekonomıkalyq turaqtylyq» (62) jáne «Infraqurylym» (69) faktorlary boıynsha Qazaqstannyń kórsetkishi ortasha deńgeıde baǵalanǵan. Sonymen qatar, «Qarjylyq júıe» (100), «Densaýlyq» (97) jáne «Innovatsııalyq áleýet» (87) DEF reıtınginde Qazaqstannyń faktorlary álsiz bolyp otyr.

Eske sala ketsek, Dúnıejúzilik ekonomıkalyq forýmnyń Jahandyq básekelestik reıtınginde Qazaqstan eki kórsetkish boıynsha birinshi orynnan kóringenin keshe habarlaǵan edik.

Al búgin Úkimettegi baspasóz máslıhatynda Ulttyq ekonomıka mınıstri Tımýr Súleımenov Dúnıejúzilik ekonomıkalyq forým reıtıngindegi Qazaqstannyń kórsetkishterin jaqsartý úshin Úkimet qandaı amaldar qarastyryp jatqanyn aıtyp bergen edi.