DDU úndi shtamynyń keń tarap jatqanyn aıtyp, dabyl qaqty

MÁSKEÝ. TASS – QazAqparat – Koronavırýstyń eń kóp taraǵan «delta» shtamyn juqtyrǵan elder men aýmaqtar sany 6-13 shilde aralyǵynda 6-ǵa ósip, 111-ge jetti. Bul týraly Dúnıejúzilik densaýlyq saqtaý uıymy málim etti, dep habarlaıdy QazAqparat TASS agenttigine silteme jasap.

DDU-nyń aptalyq epıdemıologııalyq bıýlleteninde jazylǵandaı, «alańdaýshylyq týdyratyn nusqalar» sanatyna jatqyzylǵan tórt shtammdy («alfa», «beta», «gamma» jáne «delta») juqtyrý kórsetkishi joǵary.

«Delta nusqasy sońǵy eki aıda DDU-nyń barlyq alty aımaǵyndaǵy kem degende 111 elde tabyldy, ol osy ýaqytqa deıin anyqtalǵan alańdaýshylyq týdyrǵan basqa nusqalarǵa qaraǵanda juqpalylyǵy joǵary. Bul atalǵan shtammnyń aldaǵy aılarda álemde «basty» nusqaǵa aınalýy múmkin ekenie bildiredi, - delingen uıymnyń epıdemıologııalyq bıýlleteninde.

Bir apta buryn 6 shildedegi jaǵdaı boıynsha delta shtammy 104 memleket pen aýmaqqa taralǵan edi. Al odan bir apta buryn taralǵan elder men aýmaqtar sany 96 bolatyn.

DDU epıdemıologııalyq bıýlletende 196 el men aýmaqta koronavırýs shtamdarynyń taralýy týraly málimetterdi jarııalady. Atalǵan málimetterden «delta» planetanyń kóp bóliginde taralǵany belgili boldy. Atap aıtqanda, Úndistannan basqa, Reseıde, Ulybrıtanııada, Germanııada, Grekııada, Ispanııada, Túrkııada, Frantsııada, Indonezııada, Taılandta, Japonııada, Izraılde, Brazılııada, AQSh-ta jáne Ońtústik Afrıkada anyqtaldy. Sondaı-aq, onyń Qytaıda da bolýy týraly aqparat bar, alaıda epıdemıologııalyq bıýlletenge sáıkes, bul aqparatty «DDSU resmı emes kózderden alǵan jáne ári qaraı taldanatyn bolady». Sonymen qatar, uıymda qazirgi ýaqytta Islandııada, Egıpette, Chernogorııada, Kýbada, sondaı-aq basqa da memleketter men aýmaqtarda delta nusqasynyń bar ekeni týraly málimetter joq. Olardyń jalpy sany –85.