DDU Soltústik Koreıaǵa koronavırýspen kúres boıynsha kómek kórsetýge daıyn
09:00, 13 Mamyr 2022
NUR-SULTAN. QazAqparat – Beısenbi kúni Dúnıejúzilik densaýlyq saqtaý uıymy (DDU) Koreıa Halyq Demokratııalyq Respýblıkasynda (QHDR) COVID-19-ınfektsııanyń alǵashqy jaǵdaıy tirkelgeni týraly aqparat paıda bolǵannan keıin elge qaýipti vırýspen kúres jolynda qol ushyn sozýǵa daıyn ekenin málimdedi. Bul týraly QazAqparat BUU jańalyqtar saıtyna silteme jasap habarlaıdy.
DDU KHDR bıligimen baılanysta ekenin, biraq ol eldiń densaýlyq saqtaý mınıstrliginen eshqandaı resmı habarlama almaǵanyn aıtty. Eldiń memlekettik buqaralyq aqparat quraldary Phenıanda omıkron shtamyn juqtyrý jaǵdaıy anyqtalǵanyn habarlady.
DDU-nyń Soltústik Koreıadaǵy ókili Edvın Salvador uıymnyń elge COVID-19-ǵa ázirlik jáne áreket etý ulttyq josparyn ázirleýde kómek kórsetýge daıyn ekenin aıtty. Bul jospar óńirlik deńgeıde qarastyrylyp, bekitilgen. Ol Phenıanǵa COVAX bastamalary aıasynda COVID-19-ǵa qarsy vaktsına alýǵa múmkindik beredi.
Eske sala ketsek, QazAqparat buǵan deıin Soltústik Koreıada koronavırýstyń alǵashqy jaǵdaıy tirkelgeni týraly habarlady.