DDU maımyl sheshek vırýsyna baılanysty jahandyq tótenshe jaǵdaı jarııalady

<p>ASTANA. KAZINFORM &ndash; Afrıkada keń taralǵan, ásirese Kongo Respýblıkasynda áserin kúsheıtken maımyl sheshek vırýsyna (M-pox) baılanysty jahandyq tótenshe jaǵdaı jarııalandy. Bul týraly Dúnıejúzilik densaýlyq saqtaý uıymy (DDU) <a href="https://www.who.int/news/item/14-08-2024-who-director-general-declares-mpox-outbreak-a-public-health-emergency-of-international-concern#:~:text=WHO%20Director%2DGeneral%20Dr%20Tedros,(2005)%20(IHR)" target="_blank" rel="noopener">habarlady</a>.</p>

Dúnıejúzilik densaýlyq saqtaý uıymynyń bas dırektory Tedros Adanom Gebreısýske DDU Tótenshe komıteti M-pox vırýsyna qarsy tótenshe jaǵdaı ornatýǵa keńes bergeni jáne ol usynysty birden qabyldaǵany atap ótildi.

Dırektor Dúnıejúzilik densaýlyq saqtaý uıymy qurǵan Tótenshe jaǵdaılar jónindegi komıtet otyrysynyń qorytyndysy boıynsha Afrıkada jáne basqa aımaqtarda maımyl shesheginiń odan ári halyqaralyq deńgeıde taralý áleýetine baǵa berdi. Onyń aıtýynsha, Kongo Demokratııalyq Respýblıkasynda M-pox vırýsyn juqtyrý jaǵdaılary 10 jyldan astam ýaqyt boıy tirkelip, jyldan jylǵa kóbeıip keledi.

– Ótken jylmen salystyrǵanda tirkelgen aýrýlardyń sany aıtarlyqtaı ósti. Naýqastardyń sany 14 myńnan asady. Aýrýǵa baılanysty 524 ólim anyqtaldy, – delingen DDU habarlamasynda.

Negizinen denede vırýs týdyrǵan bórtpelerge qol tıgizý, osy bórtpelermen lastanǵan kıimderdi, tósek-oryndardy, súlgilerdi jáne sol sııaqtylardy paıdalaný aýrýdyń taralýyna sebep bolady.

Vırýstyń alǵashqy belgileri 5-21 kúnde paıda bolady. Maımyl sheshek ádette joǵary temperatýrany, bas aýrýyn, arqa men bulshyqetterdiń aýyrsynýyn, lımfa túıinderiniń isinýin, sharshaýdy, qaltyraýdy jáne sýsheshek tárizdi teri bórtpelerin týdyrady. Arnaıy emi joq, biraq aýrý vırýsqa qarsy preparattarmen emdeledi. Kóp jaǵdaıda aýrý jeńil ótedi jáne naýqastar birneshe apta ishinde qalpyna keledi.

DDU 2022 jyly maımyl shesheginiń ataýyn M-pox dep ózgertti.

Aıta keteıik, buǵan deıin DDU maımyl sheshegi jaǵdaıyna baılanysty shuǵyl otyrys ótkizetinin habarlaǵan edik.