DDU qaýipti dári týraly eskertti, ol sýyq tııý men allergııaǵa qarsy qoldanylady

ASTANA. QazAqparat – Dúnıejúzilik densaýlyq saqtaý uıymy NATURCOLD preparatynyń qaýiptiligi týraly eskertedi. Bul dári Qazaqstan Respýblıkasynda tirkelmegen, dep habarlaıdy QazAqparat Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetine silteme jasap.

«Buqaralyq aqparat quraldarynda Úndistannyń Densaýlyq saqtaý mınıstrligi jótelge qarsy sırop shyǵaratyn Riemann Labs farmatsevtıkalyq kompanııasynyń qyzmetine tyıym salǵany týraly aqparat tarady. Kamerýndaǵy balalar osy sıroptyń saldarynan qaıtys bolýy múmkin dep kúdiktenedi. Kompanııanyń lıtsenzııa nómiri NATURCOLD preparatynyń qaptamasyndaǵy lıtsenzııa nómirine sáıkes keledi. Aıta keteıik, NATURCOLD Qazaqstan Respýblıkasynda tirkelmegen, sondaı-aq kóterme jáne bólshek saýda segmentinde satylmaıdy», - delingen Komıtet aqparatynda.

Sondaı-aq, bul sıroptyń quramyndaǵy málimdelgen belsendi zattar – paratsetamol, fenılefrın gıdrohlorıdi jáne hlorfenıramın maleaty. Aqparatqa sáıkes, bul zattar ártúrli kombınatsııalarda sýyq tııý, tumaý jáne allergııalyq rınıt belgilerin jeńildetý úshin qoldanylady.

«Dúnıejúzilik densaýlyq saqtaý uıymynyń resmı málimetteri boıynsha, 2023 jyldyń 27 maýsymynda Kamerýnnan NATURCOLD sıropynyń úlgileri DDSU-na berildi jáne zerthanalyq zertteýlerden ótti. Úlgilerdi zerthanalyq taldaý preparattyń jol berilmeıtin joǵary kontsentratsııada dıetılenglıkolmen lastanǵanyn kórsetti. NATURCOLD sıropynyń úlgilerindegi dıetılenglıkoldiń úlesi 28,6%-ǵa jetti. Dıetılenglıkoldiń shekti ruqsat etilgen kontsentratsııasy 0,10%-dan aspaıdy.

Dıstrıbıýtor preparattyń qaptamasynda - FRAKEN INTERNATIONAL (Anglııa) kórsetilgen. Alaıda, Ulybrıtanııanyń Ulttyq retteý organy (MHRA) bul ataýmen óndirýshi Ulybrıtanııada tirkelmegenin rastady. Qazirgi ýaqytta preparattyń shyǵý tegin anyqtaý maqsatynda tergeý júrgizilip jatyr.

DDU ishken kezde dıetılenglıkol adamdar úshin ýly ekenin jáne ólimge ákelýi múmkin ekenin eskertedi.

Sonymen qatar, kondıtsıonerlenbegen lastanǵan ónimder patsıenttiń densaýlyǵyna, ásirese balalardy emdeýde úlken zııan keltirýi, sonymen qatar ólimge ákeletin ýlanýdy týdyrýy múmkin.

NATURCOLD dárilik preparaty tabylǵan jaǵdaıda respýblıka boıynsha zańnamaǵa sáıkes tıisti ákimshilik sharalar qabyldanatyn bolady», - delingen vedomstvo habarlamasynda.

DDU-nyń preparat týraly tolyq aqparatymen myna jerden tanysýǵa bolady.